Hatutan.com, (21 Janeiru 2022), Díli—Governu liuhosi reuniaun Konsellu Ministru (KM), iha Sesta 21 Janeiru, aprova ona proposta ezonerasaun ne’ebé antes ne’e hato’o hosi Xefe Estadu Maior Jenerál FALINTIL Forsa Defeza Timor-Leste (F-FDTL), Tenente Jenerál, Tito Cristovăo da Costa “Lere Anan Timur”, hodi fila ba vida sívil.

“Ohin iha reuniaun konsellu ministru extraordinária, ko’alia asuntu ne’ebé maka relasiona de’it ho Ministériu Defeza, no F-FDTL. Hafoin diskusaun, KM aprova nomeasaun no ezonerasaun ba Xefe Estadu Maior Jenerál Forsas Armadas, Vise Xefe Estadu Maior Jenerál Forsas Armadas. KM mós reintera proposta ba Xefe Estadu Maior, ne’ebé iha semana kotuk KM haruka ona ba Prezidente Repúblika, ka reinteira,” Portavós Governu, Fidelis Manuel Leite Magalhăes, hateten iha Palásiu Governu, Sesta (21/01/2022).

𝗔𝗽𝗿𝗼𝘃𝗮saun

Delibera propoin ba Prezidente Republika:

• Ezonerasaun Tenente-Jenerál Lere Anan Timur, husi kargu Xefe Estadu-Maiór-Jeneral Forsas Armadas;
• Ezonerasaun Majór-Jenerál Falur Rate Laek, husi Kargu Vise-Xefe Estadu-Maiór-Jeneral Forsas Armadas;
• Nomesaun Majór-Jenerál Falur Rate Laek, ba Kargu Xefe Estadu-Maiór-Jeneral Forsas Armadas;
• Nomesaun Brigadeiru Jenerál Calisto dos Santos Coli (Coliati), ba Kargu Vise-Xefe Estadu-Maiór-Jeneral Forsas Armadas; no
• Mantein nomeasaun Komodoru Pedro Klamar Fuik ba Kargu Xefe Estadu-Maiór Forsas Armadas.

Hanesan dispostu iha estatutu militár sira F-FDTL foun nian no iha Lei Defeza Nasionál nian, projetu deliberasaun ne’ebé agora aprova ona, molok ne’e hetan ona  paresér favoravel husi Konsellu Superiór Defeza Militár.

Kona-bá desizaun governu nian ne’ebé antes ne’e, atu substitui Xefe estadu maior forsas armadas, Brigadeiro Jenerál Calisto dos Santos “Coliati”, lidera fali Institutu Defeza Nasional (IDN), hodi troka Comodoro Pedro Donaciano da Costa Gomes “Klamar Fuik”, la presija liuhosi PR, maibé ho politika ministériu defeza nian, bele halo internalmente.

Jornalista: Rogério Pereira Cárceres