Hatutan.com (24 Janeiru 2022) Díli—Tribunál Distritál Díli (TDD), liu hosi leitura sentensa ne’ebé lee-sai hosi juiz preizide Ivan Suritay, kondena arguidu Fernando Pereira Jorge ho pena prizaun tinan ida fulan ne’en no suspende ba tinan ida fulan ne’en, ba krime eksplorasaun ilísitu de Jogu, tanba laiha lisensa ba atividade jogu lotaria kupon SDSB.

Tribunál Distritál Díli. Foto/Hatutan.com.

Hafoin lee sai leitura sentensa, iha Segunda 24 fulan ne’e,  Tribunál esplika ba arguidu katak, arguidu la presija tama prizaun no kumpri de’it pena suspensaun tinan ida fulan neen, no arguidu labele komete tán kualkér aktu krime, bainhira arguidu komete maka sei ba tama prizaun tinan ida fulan neen.

Razaun Tribunál aplika pena suspensaun ne’e, tanba arguidu hatudu ninia arrependimentu, konfesa faktus ne’ebé iha no arguidu rasik hanesan xefe família no tenki sustenta nafatin oan na’in-haat.

Maski Tribunál konsidera faktus provadu bazeia ba arguidu nia deklarasaun katak loos duni fa’an SDSB, maibé laiha lisensa hosi Governu no la selu taxa.

Antes ne’e, tuir akuzasaun ne’ebé iha katak, arguidu servisu hamutuk ho nia kolega José Vidigál ho empreza Fu Unipessoal Lda, ba atividade jogu lotaria kupon SDSB, ne’ebé mak seidauk iha lisensa hosi autoridade kompetente.

Tanba ne’e, iha loron 02 Setembru 2020, iha tuku 19:20, servisu prevensaun PSIK detein arguidu ho situasaun flagrante delito iha José Vidigal nia residénsia, aldeia Kamalelara, Suku Dato Munisípiu Liquiça bainhira hala’o atividade jogu.

Parte PSIK konsege halo atuasaun hodi detein arguido, tanba arguidu hamutuk ho individu na’in-hitu  mak prátika hela atividade ne’e.

Ajente PSIK konsege halo atuasaun mós ba ema seluk no halo observasaun ba objetu balun, maibé arguidu konsege halai hosi ekipa PSIK ho aljema iha liman.

Tanba ne’e, Ministériu Públiku (MP) akuza arguidu ba pratika krime esplorasaun ilísitu de Jogu, ne’ebé previstu iha artigu 322 hosi kódigu penál TL.

Audiénsia julgamentu prezide hosi juiz singulár Ivan Suritay,  MP reprezenta hosi Prokuradora Lídia Soares no arguidu hetan asisténsia legál hosi Defensór Públiku Ana Cristina Pinto.

Jornalista: Carmelita Isaac