Hatutan.com (27 Janeiru 2022) Díli—Kandidatu Pezidente Repúblika ba períudu tinan 2022-2027, na’in-haat mak hanesan kandidatu hosi Partidu CNRT Jóse Ramos Horta, ho kandidatu independente Felizberto Araújo Duarte, Milena Pires no Angela Freitas, submete ona dokumentus iha Tribunál Rekursu (TR).

Kandidatu na’in-haat ne’e rejistadu iha órgaun soberania ne’e, atu kompete iha eleisaun Prezidensiál 19 Marsu 2022.

Notisia iha Relasaun:Kompete iha Eleisaun Prezidensiál, PD Depozita Konfiansa ba Assanami

Thomas Cabral hanesan Koordenadór Jerál Kandidatu Prezidente Repúblika, Jóse Ramos Horta, ko’alia ba jornalista sira hafoin submete dokumentu iha Tribunál Rekursu (TR). Foto/Facebook.

Rejistu no submisaun dokumentu hosi kandidatu Jóse Ramos Horta reprezenta hosi koordenadór jerál kandidatu, Thomas Cabral iha tuku 11:00, no kandidatu independete Felisberto Araújo Duarte to’o iha TR iha tuku 10:00 dader.

“Ami lori prosesu aprezentasaun kandidatura José Ramos Horta nian hodi intrega ba TR sobre partisipasaun ba eleisaun Prezidensiál 19 Marsu 2022. Submisaun dokumentu ne’e tuir dekretu lei artigu 15 no 17 katak rekolla asinatura, kartaun eleitór fotokopia, dokumentu kandidatu nian inklui reprezentante kandidatu hodi hato’o ba TR,” Thomas Cabral hateten hafoin submete dokumentu iha TR, Kinta (27/1/2022).

Parte TR mós simu ona prosesu, bainhira iha buat ruma la kompletu sei kontaktu fali, maibé kona-bá lista proponente iha rihun ba leten ho proporsionál hosi Munisipiu 12 inklui Rejiaun Administrativa Espesiál Oecusse Ambeno (RAEOA).

Kona-bá kandiatu Felisberto Araújo Duarte aprezenta ona dokumentu hanesan kartaun eleitorál, karta aseitasaun kandidatura ho lista proponente hamutuk 7.000-resin.

“Rejistradu ona iha TR tanba rekerimentu ne’ebé presija entrega no submete ona ba Sekretariadu TR nian. Hein de’it karik iha informasaun katak falta dokumentu balun, entaun ami sei kompleta fali,” Felisberto Araújo Duarte.

Tuir informasaun ne’ebé Hatutan.com hetan husi fontes kredível iha TR katak, iha loron Kuarta 26 fulan ne’e, kandidatu independente hanesan Angela Freitas no Milena Pires mós submete ona dokumentu hodi kompete iha eleisaun Prezidensiál tinan ne’e.

Jornalista: Carmelita Isaac