Hatutan.com, (28 Janeiru 2022), Díli–Tribunal Distritál Dili (TDD) liuhusi leitura sentensa ne’ebé lee sai husi juiz koletiva Albertina Neves, Antonio Carmona, Ercilia de Jesus, deside kondena arguidu Francisco da Silva ho pena prizaun efetivu tinan-14 ba krime arma branka no tentativa omisídiu tanba lori katana taa nia fen lezada Anita Soares Gonçalves iha parte ulun, kabas, kidan no ain to’o agora lezada nia kondisaun grave no iha de’it kursi roda. 

Ilustrasaun. Google

Razaun Tribunál aplika pena tinan 14 ba arguidu, tanba konsidera faktu provadu katak arguidu utiliza katana ho objetivu atu hakotu lezada nia vida, maske lezada la mate maibé kondisaun lezada nian justifika katak arguidu hakarak oho lezada.

Defensor Públiku Laura Valente la satisfás ho desizaun TDD, maibé iha prazu loron 15 nia laran nia parte sei ko’alia ho arguidu atu halo rekursu ka lae.

Tuir akuzasaun husi Ministériu Públiku katak maske iha ona oan nain-neen (6), maibé arguidu ho lezada Ia hela hamutuk tanba iha problema uma-laran, tanba ne’e arguidu deside sai husi uma ba hela ketak iha aldeia seluk, maibé iha loron 2 fulan-Agostu 2021, tuku 05: 00 dadeer lezada hadeer hodi fanun nia oan sira hodi prepara ba eskola, maibé nia oan la hadeer tanba ne’e lezada foti masa ba kuru-bee hodi rega sabraka oan, maibé bainhira lezada lao tun ba sabraka fatin derrepente arguidu hamriik ho jacket taka aan metin no kaer katana tula iha kabaas leten no lezada diretamente hakuak arguidu, maibé arguidu dudu lezada hodi taa lezada iha parte kabaas loos rezulta lezada monu tun ba rai.

Arguidu kontinua taa iha lezada nia kelen loos ne’ebé ikus mai halo lezada dezmaia no nia oan Elisário lori kedas lezada ba iha sentru saúde Liquiça, maibé tanba kondisaun grave liu maka halo transferénsia lalais ba HNGV.

Ho hahalok arguidu nian, Ministériu Públiku akuza arguidu ba pratika krime arma branka no tentativa omisídiu ne’ebé previstu iha artigu 142 husi kódigu penal TL.

Audiénsia julgamentu ne’e preside husi juiz koletivu Albertina Neves, Antonio Carmona, Ercilia de Jesus, MP reprezenta husi Prokuradór Napoleão da Costa no arguidu hetan asisténsia legal husi Defensór Públiku Laura Valente.

Jornalista: Carmelita Isaac