Hatutan.com, (28 Janeiru 2022), Dili-Komandu Polísia Nasionál Timor-Leste (PNTL), liuhosi Komandante Unidade Patrullamentu Fronteira (UPF), Superintendente Euclides Belo, afirma, UPF sempre prontu atu garante seguransa ba atividade kampaña to’o eleisaun prezidensiál, 19 fulan-Marsu 2022.

Komandante UPF, Superintendente Euclides Belo, foto hamutuk ho membru promovidu sira ba Ajente Prinsipál. Foto/Dok.PNTL.

Komandante Euclides Belo, esplika, baibain planu asaun sira liga seguransa nian, UPF la halo mesak, maibé ezekusaun planu sira, UPF ezekuta de’it sirkulár ne’ebé mak hasai hosi komandu jerál PNTL.

UPF mós sei apoiu ba Komandu PNTL munisipiu-tolu mak hanesan, Covalima, Bobonaro, Rejiaun Administrativa Espesiál Oé-Cusse Ambeno (RAEOA), hodi garante seguransa iha kampaña ba eleisaun prezidensiál ne’ebé besik daudauk.

Situasaun Hakmatek

Advertisement

Komandante Euclides Belo, informa mós katak, situasaun jerál oras ne’e iha liña fronteira, la’o ho di’ak, tanba UPF sempre servisu hamutuk ho komandu munisípiu sira, hodi halo vijilánsia, maske distánsia entre postu ida ba postu seluk ho área ne’ebé luan.

Iha loron 23 fulan-Janeiru ne’e, UPF konsege kaptura sidadaun na’in-tolu, karreta trek tolu, ho objetu sira ne’ebé maka konsidera kontra bandu, hanesan sigarru, ne’ebé iha ona komandu Munisípiu Bobonaro nian, hodi halo prosesu.

UPF mós estabelese tán ona postu balu iha liña fronteira, liu-liu Postu Kazus-Laran, ne’ebé oras ne’e nia prosesu konstrusaun la’o hela. Bainhira laiha impedimentu ruma, maka fulan-Fevereiru nia rohan, bele finaliza ona, nune’e bele koloka tán membru sira UPF nian, halo seguransa iha liña fronteira.

Euclides Belo esplika, objetivu ba estabelesimentu postu sira iha liña fronteira ne’e, atu bele vizibiliza polísia hodi garante liña fronteira ne’ebé seguru.

Kona-bá transporte iha UPF, Euclides Belo, hateten, iha semana kotuk, sira simu tán apoia motorizada hamutuk lima hosi Komandu Jerál PNTL no tuir planu, motorizada sira ne’e, sei distribui ba postu sira ne’ebé maka estabelese ona.

Advertisement

Oras ne’e, UPF iha karreta hamutuk 10 resin, balu Governu sosa dezde tinan 2015 no balu iha 2016, maibé karreta ida mak foin apoia iha tinan kotuk 2021, ba komandante unidade.

UPF iha membru efetivu ho hamutuk 300-resin, hodi kobre seguransa iha liña fronteira ho área total 272,2 kilómetru kuadradu. Maibé, liuhosi esforsu ne’ebé mak iha, UPF promove hela servisu ba Polisiamentu Komunitária no hetan apoiu komunidade timoroan  hotu mak hela besik iha liña fronteira terrestre.

Jornalista: Rogério Cárceres

Advertisement