Hatutan.com (31 Janeiru 2022) Díli—Projetu instalasaun Set-top Box/dexodificador  RTTL,E.P ne’ebé Ministériu Asuntu Parlamentares no Komunikasaun Sosiál (MAPMKOS) estabelese ho kompañia DILI ENTERNAL INNOVATION INFORMATION, Lda ho valór $900.000, laiha benefísiu ba komunidade iha Suku Guisu, Postu Administrativu Maubara, Munisípiu Liquiça.

Komunidade aldeia Caicassavou, Cristóvão Sanches. Foto/Hatutan.com.

Komunidade aldeia Caicassavou, Cristóvão Sanches, lamenta tanba antenna ne’ebé kompañia ba monta laiha benefísiu, liuliu la hetan kanál Rádiu Televizaun Timor Leste, Empreza Públika (RTTL,E.P), maibé hetan de’it mak kanál Xina nian ne’ebé komunidade rasik la kompreende lian Xinan nian.

Notisia iha Relasaun:Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Komunidade Becora Instala Rasik Set-top Box RTTL,E.P

Iha Vila Verde, Set-top Box RTTL,E.P Rai De’it iha Sede Suku

CAC Investiga Hela Instalasaun Set-top Box RTTL, E.P Ne’ebé Nakfilak Projetu “Fahe” De’it

AJAR Husu CAC ho MP Sériu Investiga Projetu Set-top Box RTTL,E.P

Deskonfia, Ezekutivu FFTL Balun Subar Amante

Insidente iha Resintu FFTL, Francisco Jerónimo Sei Hato’o Keixa ba Tribunál

PNTL Kontinua Prosesa Insidente iha Resintu FFTL

Oan-Feto Hosi Prezidente FFTL Konsidera Notísia Hatutan Inventa no HOAX

Exco FFTL Sei Organiza Enkontru Foti Desizaun Ba Kazu Prezidente Francisco Jeronimo

PNTL Arkiva Ona Kazu Insidente iha Resintu FFTL

“Ami simu antenna ne’e kuaze tinan ida ona. Ami mós la uza tanba ita loke ba Xina nia lian de’it. Televizaun ita nian ne’e la hetan. Ema mak mai monta duni, ami mós la hatene tanba sira mai dehan ami fó de’it ba imi. TVTL mós laiha ne’e ita atu nonton saida. Tanba ne’e mak ami la uza tiha de’it. Iha ne’e ami sira ne’ebé hetan antenna nee la uza hotu,” Cristóvão Sanches, hateten ba Hatutan.com iha nia rezidénsia Caicassavou, Sesta (28/01/2022).

Tanba ne’e, nia husu ba Governu atu fó buat ne’ebé útil ba komunidade, no la’ós fó buat ne’ebé aat no laiha benefísiu ba povu.

“Ami rekomenda ba Governu, hakarak atu fó buat ruma ba povu, di’ak liu fó buat ne’ebé di’ak, la’ós lori loos buat aat mai ita la uza tán, laiha liu benefísiu,” nia rekomenda.

Komunidade aldeia Caicassavou, Feliciano Araújo Nunes. Foto/Hatutan.com.

Nune’e mós komunidade Feliciano Araújo Nunes hateten, tinan kotuk, iha ema na’in-rua hosi Xina mak halo instalasaun iha nia uma,  no sira mai oferese gratuitamente.

Hanesan povu, Feliciano Araújo Nunes kontente loos tanba Xina sira lori mai fó gratuita de’it, no sira rasik mak monta, maibé problema maka, kanál Rádiu Televizaun Timor Leste ne’e la hetan, no hetan de’it mak kanál Xina nian, ne’ebé nia rasik la kompriende lian Xina nian.

“Sira mai monta kompletu hela, iha antenna, reciver ho fiu sira ne’e, maibé TVTL la hetan ida,” nia hateten.

Xefe Suku Guisu, Liberato Araújo Nunes, konsidera apoiu ne’e Governu fó tanba hanoin katak, buat ne’e iha benefísiu atu fó informasaun ba komunidade no ikus-mai komunidade simu hodi uza duni, maibé problema maka dala ruma loke ba mate fali no dezligadu.

Xefe Suku Guisu, Liberato Araújo Nunes. Foto/Hatutan.com.

“Ami husu tuir ba, dehan iha antenna boot Kutulau nian ne’e sei utiliza hela Jeradór, nune’e bainhira mina la iha, entaun buat ne’e mós la funsiona. Tanba ne’e, ami tenke sobu ba mai no tenke monta fali ba iha parabola mak foin bele asesu fali informasaun hosi kanál seluk, maibé TVTL mosu lakon,” nia hateten.

Tanba ne’e, husu ba Governu atu buka took fukun loloos hosi problema ne’e hodi rezolve tiha atu nune’e komunidade bele utiliza duni STB ne’e.

Nia mós informa katak, STB iha suku ne’e, hosi parte kompañia mak ba halo duni instalasaun iha komunidade nia uma.

Suku Guisu iha aldeia Lima, kompostu hosi Aldeia Caicassavou, Mau-Uno, Irlelo, Pandevou ho Vatu-Vei ho nia populasaun hamutuk 1.983 iha área suku kilómetru 33,29  kuadradu no maioria populasaun moris ho atividade agrikultura.

Projetu instalasaun Set-top Box/dexodificador RTTL,E.P ne’ebé MAPMKOS estabelese ho DILI ENTERNAL INNOVATION INFORMATION, Lda, ho nia valor $900,000. Nune’e, kustu ba instalasaun kada Set-top Box/dexodificador RTTL,E,P $30 kada benefisiáriu.

Projetu instalasaun Set-top Box/dexodificador RTTL,E.P ne’e iha faze dahuluk halo ba uma-ka’in 30.000 (rihun tolu-nulu) iha munisípiu haat (4); Díli, Liquiça, Ermera ho Manatuto.

Prezidente FFTL, Francisco M.C.P Jerónimo. Foto/Media MAPKOMS

Iha loron 19 fulan-Janeiru 2022, iha Palásiu Governu, hafoin reuniaun Konsellu Ministru (KM), Hatutan.com halo konfirmasaun ho Ministru Asuntu Parlamentar no Komunikasaun Sosiál (MAPKOMS), Francisco Pereira da Costa Jerónimo, hateten, nia laiha relasaun ho empreza DILI ENTERNAL INNOVATION INFORMATION, Lda.

“Ha’u la iha urusan, ha’u la haree sira-ne’e ida tanba há’u la hatene,” Francisco da Costa Jeronimo hateten.

Ministru Francisco Jerónimo husu ba Hatutan.com atu buka tuir iha Servisu Aprovizionamentu atu hatene projetu Set-top Box/dexodificador RTTL,E.P ho valór orsamentu $900.000, halo hosi adjudikasaun direta ka la’e. Nune’e, bele hetan prova.

“Ita boot bele ba verifika ka cek iha fatin sira-ne’e, ba iha aprovizionamentu ba cek iha ne’ebá,” Ministru  Francisco da Costa Jerónimo nu’udár mós Prezidente FFTL, haruka Jornalista Hatutan.com atu halo investigasaun kle’an.

Governante ne’e mós rejeita informasaun katak kompañia DILI ENTERNAL INNOVATION INFORMATION, Lda viola regra kontratu, hodi la halo instalasaun Set-top Box/dexodificador ba iha komunidade ida-idak nia uma.

“Ita boot bele ba halo investigasaun kompañia ba distribui de’it ka halo mós montajen pois lori informasaun mai,” Francisco da Costa Jeronimo tenik tan.

Nia informa tan katak, projetu ne’e remata ona tanba ne’e buat hotu liu hosi dalan legál.

Antenna ne’ebé instaladu iha komunidade nia uma, aldeia Caicassavou ,Suku Guisu, Postu Administrativu Maubara, Munisípiu Liquiça. Foto/Hatutan.com.

Hosi sorin seluk, tékniku balun iha RTTL,E.P ne’ebé Hatutan.com dada-lia no lakohi atu publika nia identidade hateten katak, foin lalais ne’e tékniku RTTL,E.P  hamutuk ho tékniku sira hosi MAPKOMS halo simulasaun transmitter DTMB (Digital Terrestrial Multimedia Broadcast) iha Fatuahi, Dili no iha Kutulau, hatudu katak transmisaun DTMB iha Kutulau ho Dili  bele kobre to’o Ataúro no to’o Bobonaro.

Maibé, tuir fontes tékniku RTTL,E.P nian ne’e katak, dala ruma transmitter ka torre  balun mate ka dezligadu tiha. Atu dehan de’it, katak DTMB 1KW no DTMB 2KW on air hotu ona no fatin balun mate ne’e presiza set-up fali ho didi’ak.  

Iha loron 16 fulan-Fevereiru 2021, PM Taur Matan Ruak akompaña hosi MAPKOMS ho Embaixadór Xina iha TL, Xiao Joan Gou, ofisialmente lansa Sistema Dijitalizasaun RTTL,E.P iha Suku Guisu, Maubara, Liquiça.

PM Taur iha esperansa boot no enkoraza RTTL kontinua dezenvolve-an no labele haluha RTTL nia natureza hanesan Empreza Públika. Nune’e, RTTL presiza esforsu an hodi hele akompaña ritmu dezenvolvimentu mundu.

Jornalista: Elio dos Santos da Costa