Hatutan.com, (01 Fevereiru 2022), Dili- Komunidade Xinés iha Timor Leste, Tersa (01/02/2022), selebra loron imlek (tinan foun) tuir sira-nia tradisaun hodi reza no agradese ba tinan tuan no ho esperansa simu tinan foun ne’ebe ho simblu Tigri ho karakter bee nudar sinal matak malirin.

Komunidade Xinés halo orasaun. Foto/Hatutan.com

Prezidente asosiasaun komersiál komunidade Xinés iha Timor Leste, Kathleen Gonçalves, ba jornalista sira iha fatin orasaun Xinés nian iha Bairru Formoza, Dili, hateten, komunidade Xinés iha mundu, inklui iha Timor-Leste selebra tinan foun ne’ebe tuir tradisaun Budizmu hanaran Imlek.

Imlek konsideradu nu’udar loron ida mais importante no boot liu tanba iha loron ne’e ema simu tinan foun ho esperansa foun iha familia, komunidade no ba nasaun.

Prezidente asosiasaun komunidade Xinés ne’e husu atu ho selebrasaun imlek ida-ne’e bele unifika membru komunidade Xinés hotu iha Timor Leste nia forsa hodi nafatin servisu hamutuk iha fraternidade no amizade hodi kontribui ba dezenvolvimentu iha pais ida-ne’e.

Sorin seluk, prezidente asosiasaun relijiaun Budha iha Timor Leste, Siu Peng Lay akresenta, selebrasaun Imlek tinan ne’e ho simblu Tigri, maibe hola karakter bee tamba ne’e espera katak tinan ne’e timor-oan hotu sei servisu maka’as hatudu maturidade polítika ba iha desizaun polítika hodi hili Xefe Etadu foun atu ukun povu ho domin, pas no estabilidade.

“Ita espera iha tinan foun ne’e nai ulun ne’ebe povu hili sei halo tuir povu nia hakarak,” Siu Peng Lay hateten.

Vise prezidente asosiasaun turizmu relijiozu ne’e hatutan ema hotu tenke iha konsiénsia mós atu halo buat loos hodi kontribui ba bdezenvolvimentu iha nasaun no povu nia moris di’ak.

IFong Kui Kong ne’ebe durante ne’e tau matan ba uma orasaun Xina ne’e hateten, ohin loron boot Imlek tamba ne’e komunidade Xinés ira iha Timor mai reza iha fatin ne’e hodi agradese ba tinan tuan no simu loron foun ho esperansa.

Prezidente asosiasaun komersiál komunidade Xinés iha Timor Leste, Kathleen Gonçalves ho nia maluk-sira. Foto/Hatutan.com

Fong Kui Kong salienta liután, sio ba tinan ne’e mak Tigri tamba ne’e tuir tradisaun iha tinan ne’e ema Xina nia sorte sei menus, maibe nafatin iha esperansa atu buat hotu lao diak tuir karakter bee ne’ebe iha hodi nafatin iha matak malirin.

Komunidade Xinés iha Timor Leste agradese ba governu Timor Leste ne’ebe valoriza ona loron boot Imlek ho feriadu nasional ka toleransia de pontu hodi fo biban atu komunidade Xinés sira bele festeja loron boot ne’e ho hakmatek no ksolok ho familia.

Observasaun Hatutan.com iha fatin uma orasaun Xina hatudu dragon dance halo uluk sambayang iha área uma orasaun ne’e hafoin sei kontinua ba iha loja sira empreza Xinés sira nian atu bele halo sembayang hodi duni sai sorte  hotu no hasai foer sira hodi simu tinan foun ho sorte foun.

Totál komunidade Xinés  iha territóriu nasionál hamutuk 8,000-resin no rejistu iha asosiasaun komersiál komunidade Xinés Timor Leste hamutuk 632 no membru hirak ne’e kada fulan kontribui tasa ba Estadu Timor Leste.

 Ba oin asosiasaun komunidade Xinés  sei nafatin halo rejistrasaun atu bele atribui ba hasae reseita doméstika Estadu Timor Leste nian.

Jornalista:  Vito Salvador