Hatutan.com (02 Janeiru 2022) Díli—Kandidatu independente ba Pezidente Repúblika períudu tinan 2022-2027, Lere Anan Timur, rejistadu iha Tribunal Rekursu (TR), ho proponente mai hosi munisípiu 12 ho Rejiaun Administrativa Espesiál Oecusse Ambeno (RAEOA) hamutuk 9.000.

Lere Anan Timur. Foto/facebook.

Kandidadatu Independente ne’e rejistadu hafoin submete dokumentu hanesan karta deklarasaun no aseitasaun hosi kandidatu nian, karta designasaun reprezentante, dokumentu komprovativu hanesan lista asinatura, kartaun eleitorál hosi proponent sira.

Notisia iha Relasaun:BREAKING NEWS: CCF “Taka”, Lere ho Ekipa Seidauk Foti Kartaun Membru FRETILIN

Rejistu no submisaun dokumentu hosi kandidatu ne’e reprezenta hosi portavóz ekipa susesu, Vito Simões iha tuku 11:39.

Advertisement

“Realmente iha proponente rihun 20-resin, maibé tanba ami hakarak fasilita servisu TR nian atu halo nia servisu, tanba ne’e ami lori de’it dokumentu proponente 9.000, hodi mai rejista iha loron ohin. Kandidatu Lere sente kontenti tanba nia hanesan kandidatura hosi povu no veteranu sira,” Vito Simões hateten hafoin rejistu iha TR, Kuarta (02/02/2022).

Maske nia kandidatura independente, maibé konsidera nafatin FRETILIN hanesan Filozofia Politika ida ho nune’e militante barak hosi partidu ne’e fó nafatin suporta no sei la husik kandidatura ne’e mesak.

Tanba ne’e, iha loron 03 fulan ne’e, Lere mós sei ba foti kartaun militante iha sede FRETILIN no iha loron 05 sei halo deklarasaun ofisiál iha Munisipiu Ainaro.

To’o loron 02 fulan Fevereiru tinan 2022, kandidatura hamutuk na’in-hitu mak rejistadu iha TR, kompostu hosi kandidatu hosi partidu CNRT, José Manuel Ramos Horta, partidu KHUNTO Armanda Berta dos Santos, Partidu FRETILIN Francisco Guterres Luo-Olo, kandidatu independente kompostu hosi Felisberto Araújo Duarte, Milena Pires no Angela Freitas inklui Lere Anan Timur.

Jornalista: Carmelita Isaac

Advertisement