Connect with us
Pakote Ahi

Defeza & Seguransa

Memória Funu “Kesi-Metin” Relasaun Lere ho Falur

Published

on

Hatutan.com, (02 Fevereiru 2022), Díli—Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál, Tito Cristóvão da Costa “Lere Anan Timur” ofisialmente, reforma ona hosi instituisaun ne’e, maibé, Domingos Raúl “Falur Rate Laek”, ne’ebé foin hetan fiar hosi Estadu, hodi lidera fali instituisaun ne’e afirma, memória funu durante tinan 24 iha ai-laran, sei la hakotu relasaun amigável.

Xefe Estadu, Francisco Guterres Lú Olo hala’o Inspesaun ba Parada Militár, iha Serimónia aniversáriu transformasaun FALINTIL ba F-FDTL, ba dala-XXI (21), iha Kuartél Jenerál Fatuhada, Díli, Kuarta (02/02/2022). Foto/Hatuatan.

Atuál Xefe Estadu Maiór F-FDTL, Falur Rate Laek afirma, memória funu entre nia ho Tenente Jenerál Lere Anan Timur, ‘difísil’ atu hafahe, tanba sira iha relasaun ne’ebé metin, hahú kedan hosi ai-laran.

“Memória ida sofrimentu ninian ne’e ha’u atu ba haluha ida-ne’e susar. Relasaun ami nian ne’e kesi metin buat barak liu, duké ida fahe. Fahe mak normalmente, família agora fahe, azvezés fahe poder, no politika mós. Maibé ida sofrimentu ne’ebá ne’e, tinan barak liu, ohin ha’u hateten dehan, la’ós oitoan mak ami toba hamutuk, la’ós oitoan mak ami han hamutuk, la’ós oitoan mak ami la’o hamutuk, la’ós oitoan mak ami servisu hamutuk. Ida-ne’e, ema ida, buat ida, nein bomba mós labele fahe,” “Falur Rate Laek”, hafoin seremónia aniversáriu transformasaun FALINTIL ba F-FDTL, ba dala-XXI (21), iha Kuartél Jenerál Fatuhada, Díli.

Durante tinan barak, hamutuk iha instituisaun Falinitil FDTL, sira iha esperiénsia barak ba malu, tuir ida-idak nia karáter, to’o iha relasaun emosionál ba malu ne’ebé liu fali ho maun-alin rasik.

Advertisement

Lere Parabeniza Xanana-Taur

Eis Xefe Estadu F-FDTL, Tenente Jenerál reformadu, Tito Cristóvão da Costa “Lere Anan Timur”, hato’o parabens ba Eis Komandante en-xefe Frente Armada ba Libertasaun Nasionál Timor-Leste, Kay Rala Xanana Gusmão, no Eis Vise Komandante en-xefe Falintil, Taur Matan Ruak, tanba bele komanda funu durante iha situasaun difísil, to’o Timor-Leste hetan ukun-rasik aan.

“Parabéns ba forsas armadas libertasaun nasional ne’ebé nakfilak an ba forsa defeza de Timor-Leste. Parabéns ba maun-boot Xanana, parabéns ba maun-boot Taur Matan Ruak, imi bele komanda imi nia militár sira iha situasaun difísil, bele lori oitoan mai vila, hasa’e bandeira independénsia, ho ninia povu, no ohin loron nakfilak aan forsa de defeza Timor-Leste”, Lere Anan Timur, hateten liuhosi diskursu.

Lere Anan Timur, hato’o mós agradesimentu ba nia irmaun, kompañeiru, Francisco Guterres “Lú Olo”, ne’ebé ohin loron nu’udár Prezidente Repúblika (PR), ho Taúr Matan Ruak, ne’ebé ohin loron mós nu’udár Primeiru Ministru (PM).

“Ho imi nia vontade, fuan boot no kontribuisaun tomak, aseita ha’u nia rekerimentu ba ezonerasaun hosi ha’u nia kna’ar, nu’udár Xefe Estadu Maiór Forsas Armadas, durante tinan 10 resin,” Lere Anan Timur, agradese.

Advertisement

Agradese mós ba Ministru Defeza (MD), Brigadeiru Jenerál reformadu, Filomeno da Paxăo de Jesus, tanba bele defere ninia reforma, ne’ebé promulgadu iha loron 28, fulan-Janeiru tinan 2022.

Iha diskursu, Prezidente Repúblika (PR), Francisco Guterres “Lú Olo”, dehan, loron 02 Fevereiru, fó hanoin hikas momentu istóriku hosi FALINTIL ninia estabelesimentu iha Aileu nu’udár susesór lejítimu ba gloriozas FALINTIL. Katak Frente Armada, ne’ebé tuba rai metin ho espíritu asua’in hodi luta ho nia kbi’it rasik hasoru okupasaun militár iha Timor-Leste durante tinan 24 nia laran.

Xefe Estadu “Lú Olo” dehan, buat ne’ebé FALINTIL, hanesan servidór Estadu, husik hela nu’udár legadu di’ak ida ba povu TL tomak, mak Pátria nia independénsia, hamutuk ho prinsípiu no valore sira ne’ebé kesi asua’in sira nia hamutuk no sai nu’udár aliserse loloos ba povu TL nia Estadu Direitu Demokrátiku.

“Ha’u hakarak hato’o saudasaun ba militár no sivíl sira-ne’ebé loroloron serbisu ho dedikasaun no empeñu tomak no kumpre misaun sira-ne’ebé mak fó ba sira atu hala’o, ho neon no laran tomak, hodi defende Timor-Leste. Ha’u agradese mós imi ida-idak ne’ebé hola parte iha serimónia ida-ne’e, liuliu ita-nia militár no eis-kombatente sira. Nasaun deve barak tebes ba sira,” Xefe estadu Francisco Guterres “Lú Olo”, afirma.

PR Lú Olo, haree katak, transformasaun no mudansa hala’o iha Falintil FDTL, ho ritmu ne’ebé aas tebes no prosesu renovasaun ba kargu akontese tanba Forsas Armadas liu hela prosesu dezenvolvimentu no modernizasaun.

Advertisement

“Tanba ne’e mak ita tenke haree mudansa ba Komandante Militár ho pozitivu no fiar metin, nu’udar situasaun baibain ida. Mudansa hirak-ne’e hanesan prosesu naturál ida, ne’ebé akontese beibeik ona ba ita-nia lideransa militár dezde kedas restaurasaun independénsia,” Lú Olo dehan.

Prezidente “Lú Olo” husu ba ema hotu, atu haree ba mudansa ida-ne’e hanesan sinál konfiansa hosi podér polítiku ba iha instituisaun militár nomós ba iha kapasidade lideransa xefia sira-nian no, iha tempu hanesan, sai hanesan insentivu ida ba ita-nia militár sira atu dezenvolve espetativa ba progresaun iha karreira militár.

Iha seremónia aniversáriu transformasaun FALINTIL ba FALINTIL-FDTL, dala-XXI ne’e, hala’o mós promosaun deziva ba Domingos Raúl “Falur Rate Laek”, ho postu Tenente Jenerál, ho kargu Xefe Estadu Maiór F-FDTL, hodi substitui fali Tenente Jenerál Lere Anan Timur, ne’ebé reforma ona no fila ba vida sivíl.     

Jornalista: Rogério Pereira Cárceres  

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Defeza & Seguransa

PNTL Detein Autór Sobu Kadeira iha GMT Laran

Published

on

Hatutan.com, (21 Maiu 2024), Díli-Polísia Nasionál Timor-Leste (PNTL) Munisípiu Díli kaptura no detein autór ida ho inisial MdS tanba harahun kadeira tuur-fatin hamutuk 14 ne’ebé baibain adeptu sira tuur durante asiste Kampionatu Nasionál Boxe iha salaun Jinájiu Munisipál Díli (GMT-sigla Indonézia).

(more…)

Kontinua Le'e

Defeza & Seguransa

UPF Prende Kombustivel Litru 245 iha Memo-Maliana

Published

on

Hatutan.com, (17 Maiu 2024), Díli-Polísia Nasionál Timor-Leste (PNTL) husi Unidade Patrullamentu Fronteira (UPF) prende  kombustivel ho kuantidade litru 245 iha área Memo, Postu Administrativu Maliana, Munisipiu Bobonaro.

(more…)

Kontinua Le'e

Defeza & Seguransa

Diretór Nasionál PCIC Vicente e Brito Rekoñese Nia Oan-mane Uza Pistola Treinu Tiru

Published

on

Hatutan.com, (14 Maiu 2024), Díli-Diretór Nacional bá Policia Científica e de Investigação Criminal (PCIC), Vicente Fernandes e Brito,  ‘rekoñese’ fó pistóla bá oan-mane hodi treinu tiru hamutuk ho membru  PCIC sira iha área Kaitehu, Suku Tibar, Postu Administrativu Bazartete, Munisípiu Liquiça.

(more…)

Kontinua Le'e
Advertisement

Trending