Hatutan.com, (02 Fevereiru 2022), Dili-Polísia Nasionál Timor-Leste (PNTL) liuhosi Komandu Munisípiu Dili, detein membru arte marsiál Ikatan Keluarga Silat Kera Sakti, Putera Timor Leste (IKSP-TL) ho membru arte rituál Sete-Sete (77) hamutuk na’in-28 no halo apreensaun ba motór 10-resin.

Membru PNTL ida halo hela intervensaun ba konfrontu entre membru grupu arte marsiál Kera Sakti ho membru arte rituál 77, Tersa (01/02/2022). Foto/Repro

Maske PNTL la informa detallu númeru membru IKS Kera Sakti hira no membru husi 77 nian hira, maibé PNTL deskonfia forte katak sira hirak-ne’e mak envolve iha  konfrontu iha Dili, Tesa (01/02/202).

“PNTL konsege dispersa ema hirak ne’ebé mak halo problema. Ami konsege detein ema hamutuk na’in-28 ho evidénsia motór 10-resin,” Komandante PNTL Munisípiu Dili, Superintendente Xefe Henrique da Costa, informa ba jornalista, hafoin partisipa iha serimónia aniversáriu transformasaun FALINTIL ba F-FDTL, ba dala-21, iha Kuartél Jenerál Fatuhada, Dili, Kuarta (02/02/2022).

Membru arte marsiál IKS Kera Sakti ho 77 hirak-ne’e detein hela  iha sela Polísia hodi submete ba investigasaun.

Hosi sorin seluk, Komandu Jerál PNTL liuhosi Komandante Operasaun Nasionál, Superintendente Xefe Pedro Belo, halo xamada ona ba iha lideransa  sira hosi grupu rua ne’e nian no hasoru-malu ona hodi halo kompromisu kontrola nia membru sira.

Komandante Henrique haktuir, konfrontu ne’e, mosu, bainhira membru sira hosi IKS Kera Sakti akompaña mate-isin matebian Nunçio Soares hosi Ospitál Nasionál Guido Valadares (HNGV) atu lori ba Tasi Tolu.

Matebian Nunçio Soares hetan sona hosi suspeitu ho inisiál JV, iha festa kulturál ida iha área Maslidun, Aldeia 12 de Outubru, Postu Administrativu Dom Aleixo, Dili, Sábadu madrugada (29/01/2022). 

Bainhira matebian Nunçio Soarea nia kolega sira husi IKS Kera Sakti akompaña mate-isin to’o iha Maslidun, mosu mós kazu insidente sona-malu ida, no uma ida hetan sunu. Maibé, suspeitu ne’ebé maka sona vítima ne’e, PNTL kaptura ona, no oras ne’e daudaun halo hela prosesu.

“Akontesimentu ida horiseik ne’e, informasaun relatóriu ne’ebé mak ami iha, foin ema na’in-ida, ida ne’ebé mak hetan sona, mais seluk tán, to’o ida ne’e, ita seidauk iha informasaun ruma,” Henrique da Costa, hateten.

Komunidade sira paniku ho konfrontu entre membru arte marsiál Kera Sakti ho arte rituál 77 iha Tasi Tolu, Dili, Tersa (01/02/2022). Foto/Repro

Matebain Nunçio Soares nia isin-mate transporta sai ona hosi Dili área destinadu, Postu Administrativu Maubisse, Munisípiu Ainaro atu halo prosesu funerál. Komandu PNTL Munisípiu Dili ho apoia hosi Unidade Espesiál Polísia (UEP), Unidade Patrullamentu Fronteira (UPF), destakadu iha Postu aeroportu, Unidade Polísia Marítima (UPM), ho unidade sira seluk, eskolta lori ba iha fronteira, hodi entrega ba iha Komandu Munisípiu Aileu, atu nune’e akompaña tán, lori liubá iha Maubisse.

Jornalista: Rogério Cárceres