Hatutan.com (15 Fevereiru 2022), Díli—Tribunál Distritál Díli (TDD) liu hosi leitura sentensa ne’ebé lee  hosi juiz kolektivu Ana Paula Fonseca, Maria Solana, Ivan Surytai, deside aplika pena prizaun tinan rua no suspende ba tinan lima sen kustu judisiáriu ba Funsionáriu Públiku Parlamentu Nasionál (PN), arguidu Justino de Jesus Salsinha Babo, tanba fa’an ona komputadór PN, ba nia kolega Isabel Alves Ximenes.

Edifísiu Tribunál Rekursu. Foto/Hatutan.com.

Razaun Tribunál aplika pena suspensaun tanba faktus provadu maske arguidu nega, maibé TDD konsidera deklarasaun hosi sasin sira.

Notisia iha Relasaun:Fa’an Komputadór PN, MP Husu Tribunál Aplika Pena Prizaun Tinan-Rua Ba JSB

Alende ne’e, TDD konsidera daudaun ne’e arguidu kontinua servisu iha PN nu’udár pesoál Informasaun Teknolojia (IT), tanba ne’e atu evita labele akontese tán aktu krime ne’ebé hanesan maka TDD deside fó pena suspensaun tinan lima.

Advogada privada, Virna Carvalho seidauk simu notifikasaun hosi TDD kona-bá desizaun ne’ebé TDD aplika ba nia kliente.

“TDD nia desizaun katak ha’u nia kliente hetan pena prizaun tinan rua no suspende tinan lima, maibé momentu desizaun ha’u la partisipa. Tanba ne’e, ha’u nia kolega mak substitui maibé ha’u nia kolega mós ba tarde ho nune’e ami sei hein TDD nia notifikasaun,” Virna Carvalho via telefónika, Tersa (15/02/2022).

Antes ne’e, tuir akuzasaun hosi MP katak arguida hahú serbisu FP iha PN ho level 5 nu’udár  tékniku IT, maibé iha tinan 2006/2007 PN sosa komputadór HP Paviliion G3033L (inklui asesoria) hamutuk 12, ho presu kada unidade $1.150, Network printer, HP Laser Jet 3005n unidade 1 ho presu kada unidade $1,540, HP Laser Jet 1022 unidade 12 ho presu kada unidade $395, HP Color Laser Jet 2605DN unidade 2 ho presu kada unidade $720, UPS Prolink PRO 600 unidade 16 ho presu kada unidade $155, softwere Microsoft Window XP Prof. SP2, unidade 16 ho presu kada unidade $175 no microsoft Office 2007 basic, unidade 16 ho presu kada unidade $225.

Iha tinan 2012, arguida fó hatene ba Isabel Alves Ximenes katak komputadór unidade 1 ho folin $400, komputadór ne’e nia maun lori hosi Indonézia, foin uza tinan 1 no sei di’ak, mana bele fiar, tanba nia servisu iha IT, tanba ne’e Isabel mós fiar hodi sosa ho folin $300, maibé bainhira atu uza la di’ak tanba komputadór la funsiona.

lha loron 01 fulan Agostu tinan 2016, Isabel Alves Ximenes rona informasaun hosi Jorge Paiva, katak nia mós sosa komputadór ida hosi arguida maibé komputadór refere afinál Patrimóniu Parlamentu Nasionál.

Tanba ne’e, Isabel Alves Ximenes informa kedan ba Lino Soares, nu’udár Xefe Lojístika PN katak, nia parte sosa komputadór ida hosi arguida no daudaun iha hela uma, no Lino Soares haruka Isabel Alves Ximenes entrega komputadór ne’e hodi konfirma ho sistema baze de dadus no ikus mai deteta katak, komputadór ne’e patrimóniu PN.

Depois halo identifikasaun ho sistema baze de dadus iha Lojístika PN identifika katak, komputadór ne’ebé arguida fa’an ba Isabel Alves Ximenes mak komputadór ne’ebé kompostu hosi Monitór ho númeru serial koi mós tiha, key board 1 ho marka HP ho númeru serial BC3880 FVBW9FVB, ho ninia presu $1.150 no CPU 1 ho numeru serial SGH7260GQV SGH7260GQV ho $1.155 nune’e  totál presu hamutuk $ 1.305.

Relativamente iha prosesu investigasaun iha loron 19 fulan Juñu tinan 2018, Gabinete Sekertáriu Jerál PN voluntariumente entrega objetu ekipamentu komputadór unidade ida ba iha Komisaun Anti Korupsaun, nu’udár meius prova, tanba ne’e MP akuza arguida ba pratika krime pekulatu ne’ebé previstu iha artigu 295 hosi kódigu penál TL.

Audiénsia julgamentu iha Tersa 15 fulan ne’e  prezide hosi juiz kolektivu, Ana Paula Fonseca, Maria Solana, Ivan Suritay, MP reprezenta hosi prokuradór Rogério Viegas no arguidu hetan asisténsia legál hosi Advogada Virna Carvalho.

Jornalista: Carmelita Isaac