Hatutan.com (19 Fevereiru 2022) Díli—Komisaun Nasional Direitu Labarik (KNDL) husu ba kandidatu Prezidente Repúblika 2022-2027 atu labele utiliza labarik iha eventu kulturál kampaña.

Notísia iha Relasaun: Dadus KNDL, Labarik 300 Envolve iha Traballu Apoia Família

Labarik sira halimar hela iha tempu inundasaun iha Díli, 05 fulan-Janeiru 2022. Foto/Hatutan.com

KNDL nia knar bazeia ba dekretu lei nu.5/2021 artigu 3 hodi fó biban ba KNDL hodi garante labarik nia direitu iha kualkér atividade Estadu nian.

“Atu garante iha atividade hotu ne’ebé Estadu halo labele viola direitu labarik nian, tanba ne’e husu ba kandidatu sira atu labele utiliza labarik iha kampaña tantu iha eventu kulturál kampaña, tanba define klaru katak ema ho idade 17 ba leten maka bele sai eleitór no antes idade 17 labele partisipa iha kampaña eleitorál ne’ebé prejudika no fó risku ba labarik,” Komisária Direitu Labarik Dinorah Granadeiro liu husi nia intervensaun iha enkontru entre CNE, PNTL no kandidatu PR sira iha salaun CNE, Dili, Sábadu (19/02/2022).

Esforsu ne’ebé KNDL sei halo hodi garante labarik la partisipa iha kampaña maka sei utiliza mídia hodi hakle’an informasaun no hasa’e konsiénsia ema hotu atu labele utiliza labarik sai alvu kampaña polítika.

KNDL suzere ba CNE atu kria regra bandu labele utiliza eskola sai hanesan fatin kampaña tanba fó risku ba labarik iha prosesu aprendizajen.

Hatán ba preokupasaun ne’e, reprezentante kandidatura PR José Manuel Ramos-Horta nian, Thomas Cabral hateten iha tempu kampaña kandidatura labele halo kontrolu hodi garante labarik labele partisipa iha kampaña ho nune’e nia parte aseita hodi utiliza meius komunikasaun hodi apela ba ema hotu.

“Husu kandidatu apoiu partidu no independente sira atu uza meius komunikasaun sosiál hodi dehan ona bandu labarik  sira-nia partisipasaun iha kampaña polítika,” Thomas Cabral.

KNDL mós sei halo monitorizasaun iha prosesu kampaña no karik involve labarik maka KNDL sei submete ba  prosesu legal.

Jornalista: Carmelita Isaac