Hatutan.com, (21 Fevereiru 2022), Díli-Inundasaun iha área mota Comoro, Dili, Segunda loraik (21/02/2022), rezulta família  uma kain 37  sofre maka’as.

Inundasaun iha área Comoro, Dili, kauza husi mota boot no udan ho intensidade maka’as iha Munisípiu Aileu. Foto/Hatutan.com

Hosi sorin seluk, maki ka eskavadora rua husi Institutu Jestaun Ekipamentu (IGE, sigla portugés) nian ne’ebé halo hela rekuperasaun ba mota iha Suku Hera, mout tanba udan-boot no mota tuun ho korrente maka’as.

Dadus provizóriu husi Dezastre Naturais Timor Leste ne’ebé hatutan.com asesu husi pájina Facebook ofisial Dezastre Naturais Timor Leste nian hatudu katak akontesimentu udan-boot iha área Munisípiu Aileu nian halo mota Comoro nakonu ho udan-been no lori sofrimentu direta ba família uma kain  37.

 Iha oras balun nia laran, ekipa autoridade Munisípiu Dili ho Sekretáriu Estadu Protesaun Sivíl liuhusi DNGRD evakua ona família afetadu husi inundasaun ba sentru evakuasaun.

Advertisement

Domingos Ximenes Freitas, abitante Comoro ne’ebé konstrui nia uma iha tinan 2019 iha Aldeia Fomentu, sofre liu tanba nia uma monu tuun ba tiha mota laran.

Domingos Ximenes Freitas ba Hatutan.com hateten, iha kalamidade 04 Abríl 2021, nia uma nakfera ona no bainhira nia fila husi servisu fatin mai haree udan-boot nia halot de’it mak dokumentu importante hodi salva, maibé sasán uma laran la salva total no monu hamutuk ho uma tuun hotu ba mota laran.

 “Dokumentu balun salva, maibé sasán uma laran bee lori hotu kedas,” Domingos Ximenes Freitas hateten.

Domingos Ximenes Freitas haktuir sira hamutuk na’in-neen (6) mak hela iha uma ne’e no estudante na’in-tolu (3) nia dokumentu la konsege salva tamba balun ba foho no balun seidauk fila husi kampus.

Domingos Ximenes Freitas, vitima inundasaun ne’ebé rezulta nia uma monu tama ba mota laran. Foto/Hatutan/com

Tuir observasaun Hatutan.com  iha lokál akontesimentu nota katak komunidade sira nia uma iha área besik mota ibun Comoro nian bee nalihun tama hodi rezulta sira-nia sasán uma laran balun la aproveita.

Hatutan.com tenta halo konfirmasaun ho autoridade lokál Aldeia Fomento II hodi husu dadus uma kain afetadu loloos no total populasaun ne’ebé aldeia ne’e iha, maibé seidauk bele fó informasaun tanba sei okupadu atende evakua komunidade afetadu sira.

Advertisement

Sekretáriu Estadu Protesaun Sivíl liu husi korpu Bombeiru halo ona atendimentu hodi evakua komunidade afetadu sira ba fatin seguru.

Hosi sorin seluk, Agustinho Mendonça, abitante ne’ebé hela iha Munisípiu Aileu haktuir ba Hatutan.com  via telefónika katak, udan boot iha Aileu akontese desde meiudia tuku 12:00 Otl, no to’o kalan ne’e udan sei kontinua tau hela ho intensidade maka’as.

“Ami iha ne’e, horisehik udan, maibé ladún makas, kalan udan maibé para tiha no hahú dadeer ne’e nakukun no meiudia ne’e maka udan boot too agora mós sei udan,” Agustinho Mendonça hateten.

Jornalista: Vito Salvador

Advertisement