Hatutan.com, (22 Fevereiru 2022), Lautem-Ajénsia internasionál liuhosi CARE International ho Child Fund iha Timor-Leste, Tersa (22/02/2022), hala’o monitorizasaun ba ekipamentu sira prevensaun  COVID-19 nian ne’ebé molok ne’e, sira distribui ba eskola hamutuk 28 ho Postu Saúde 13 iha Postu Administrativu Iliomar ho Lautem, Munisípiu Lautem. 

Notísia iha Relasaun: Austrália Apoia Komunidade Caibada Uaima’a Hakiak Manu Lokál

Livelihood Coordinator Child Fund nian iha Munisípiu Lautem, Gonçalo Ximenes. Foto/Hatutan.com

Apoiu projetu ida-ne’e, hanaran Australian Humanitarian Partnership (AHP) ne’ebé finansia orsamentu hosi Governu Austrália, no implementa hosi konsórsiu ONG sira Internasionál nian, mak hanesan, CARE International, Caritas Austrália, Oxfam, Plan no World Vision iha TL  no mós organizasaun nasionál ba ema ho defisiénsia nian Ra’es Hadomi Timor oan (RHTO) inklui parseiru lokál sira seluk.

Iha Munisipiu Lautem, ekipamentu sanitáriu sira ne’ebé distribui ba eskola ho postu saúde sira, hetan konsórsiu hosi Plan International, maibé nia parseiru Child Fund mak mobiliza nia implementasaun.

Livelihood Coordinator Child Fund nian iha Munisípiu Lautem, Gonçalo Ximenes esplika, objetivu hosi vizita ne’e, atu bele observa fila-fali projetu sira ne’ebé durante ne’e sira implementa. Konteúdu projetu ida-ne’e mak, halo distribuisaun ba fasilidade sira sanitária nian hodi prevene aan hosi COVID-19 iha nivel komunidade.

“Ba Child Fund, durante ne’e, suporta ona eskola sira iha postu rua iha Munisípiu Lautem, liu-liu Postu Lautem ho Postu Iliomar, ho totál eskola 20 resin. Material ne’ebé ita suporta ba eskola sira-ne’e relasiona ho prevensaun COVID-19 nian, ita distribui balde tau bee-moos hodi fase-liman, sabaun ho material ijiene nian, kuaze ba iha ita nia eskola sira iha ensinu báziku sira iha postu rua ne’e,” Livelihood Coordinator Child Fund nian iha Munisípiu Lautem, Gonçalo Ximenes, hateten ba jornalista sira iha eskola bázika filiál, Ta-besi Fera-nabeen, iha Suku Fuat, Postu Administrativu Iliomar.

Iha tinan 2022 nia laran ne’e, Child Fund sei fó tan apoiu ne’ebé hanesan, ba iha eskola no postu saúde sira iha Postu Administrativu Luro.

Kona-bá kuantidade material hirak ne’ebé atu fó tulun ba eskola ho postu saúde sira ne’e, bazeia ba rezultadu hosi levantamentu ne’ebé ekipa sira hala’o, no depende mós kondisaun, ka nesesidade komunidade nian. Maibé, jerálmente, Child Fund distribui balde fase-liman, sabaun, ho material cleaning, hodi uza ba hamoos sala de aula sira.

Durante halo monitorizasaun ba projetu iha fatin hirak ne’ebé apoia bá, parte CARE International ho Child Fund observa katak, fasilidade sanitária hirak ne’e, kuaze kondisaun sei di’ak, no daudaun ne’e, benefisiáriu sira sei utiliza iha ida-idak nia eskola ho postu saúde sira.  

“Iha inísiu, sira iha problema uitoan kona-bá fasilidade sira hanesan tanke fase-liman no laiha bee, mas através apoiu hosi Child Fund, entaun ita utiliza tiha hosi ita nia tulun sira ne’e ba eskola sira, hodi estudante sira bele fase-liman. Sé iha postu saúde sira karik, pasiente sira ne’ebé mai halo tratamentu saúde ka halo konsulta, sira bele fase-liman,” Gonçalo hateten.

Koordenadór Child Fund nian iha Lautem ne’e informa, material hirak ne’ebé fó ona tulun, la’ós ona Child Fund nian, maibé komunidade mak sai na’in. Nune’e, husu atu utiliza ho didi’ak, hodi bele dura to’o tempu naruk.

Projetu AHP, ne’ebé finansia hosi Governu Austrália ne’e, hahú iha fulan-Juñu 2021, sei remata iha fulan-Marsu 2022.

Koordenadór Eskola Ta-besi Fera-Nabeen iha Suku Fuat, Postu Administrativu Iliomar, Alégria David. Foto/Hatutan.com

Koordenadór Eskola Ta-besi Fera-Nabeen iha Suku Fuat, Postu Administrativu Iliomar, Alégria David, agradese ba Child Fund nia tulun tanba fasilita ona apoiu sanitáriu ba iha sira-nia eskola.

Daudaun ne’e, manorin-na’in ho estudante sira sempre uza ekipamentu sanitáriu hirak ne’e, liuhosi fase-liman beibeik hodi hadook aan hosi propagasaun COVID-19.

“Ami sente haksolok, tanba saida?, tanba sira fó apoiu másimu, parte material ne’ebé mak sira fó ba ami, depois ami mós utiliza iha eskola, atu ami nia oan sira ne’e bele livre hosi moras COVID-19,” Alégria David hateten.

Child Fund sira apoiu mós broxura ka stiker ba manorin-na’in sira, hodi esplika fila-fali ba estudante sira atu bele komprende kona-bá COVID-19 no ninia maneira prevensaun sira.

Xefe Postu Saúde Postu Administrativu Iliomar, Narçisio Camões hatutan, durante prezensa Child Fund nian iha Iliomar sempre ajuda médiku sira, liuhosi servisu hamutuk iha medida sira kona-bá prevensaun ba moras COVID-19 ninian.

Xefe Postu Saúde Postu Administrativu Iliomar, Narçisio Camões. Foto/Hatutan.com

Xefe Postu Saúde Iliomar ne’e rekoñese, Child Fund mós fasilita ona iha distribuisaun ekipamentu prevensaun ba moris COVID-19 nian, hanesan balde fase-liman, sabaun no hand sanitizer.

“Kona-bá Child Fund nia prezensa iha sentru saúde Iliomar, sira nia suportasaun liu-liu ba atu prevene COVID-19 nian ne’e, depois suporta mós mai ami nia pesoal saúde sira. Iha ne’e, ami koopera nafatin, tanba ida ne’e, dala-ida tán, agradese ba parte Child Fund, tanba ho sira nia prezensa iha Iliomar, bele ajuda ona ami hodi servisu hamutuk, ba atende komunidade,” Xefe Postu Saúde Iliomar, Narçisio Camões rekoñese.

Iha Iliomar, reprezentante Child Fund nian sira sempre servisu hamutuk mós ho pesoál saúde sira hodi halo advokasia ka fó hanoin ba komunidade sira kona-bá Corona-virus, no oinsá mak bele prevene aan.

Jornalista: Rogério Cárceres