Hatutan.com, (23 Fevereiru 2022), Lautém—Iha tinan 2012, Ministériu Edukasaun Juventude no Desportu (MEJD) harii Eskola Ensinu Bázika Filiál (EBF) ho naran Ta-besi Fera-Naben Fuat, iha Postu Administrativu Iliomar, Munisípiu Lautém, maibé oras-ne’e sei menus sala de aula tanba númeru estudante ne’ebé hahú aumenta.

Eskola Ensinu Bázika Filiál (EBF) ho naran Ta-besi Fera-Naben Fuat, iha Postu Administrativu Iliomar, Munisípiu Lautém. Foto/Hatutan.com.

Objetivu harii eskola ida ne’e, atu fasilita komunidade liuliu inan-aman sira bele haruka oan ba eskola, la’o ho distánsia ne’ebé besik.

“Ami nia difikuldade maka menus sala de aula, agora daudaun ami utiliza hela sala de aula tolu. Ida-ne’e, fahe ba dadeer no lorokraik,” Koordenadór Eskola Ta-besi Fera-Naben, Alegria David informa iha Suku Fuat, Iliomar, Tersa (22/02/2022).

Tuir dadus, totál estudante iha eskola ne’e hamutuk 147. Haree ba kondisaun sala de aula nian ne’ebé limitadu, ikus mai manorin-na’in sira deside fahe oráriu hanorin nian entre dadeer ho lorokraik.

“Dadeer parte hosi primeiru, segundu, terseiru anu, no kuartu, kintu ho sestu parte lorokraik ninian,” Koordenadór eskola ne’e informa.

Maioria komunidade nia oan hosi Suku Fuat, Maluhira, Luratu, Maluro ho Caenliu mak eskola hotu iha Eskola ne’e.

Husu Aumenta tán Profesór

Koordenadór Eskola ne’e mós husu ba Governu liuhosi MEJD, atu halo tán rekrutamentu ba professór, tanba durante ne’e iha de’it manorin-na’in hamutuk na’in-lima mak tau hela matan ba estudante sira.

Tuir Alegria, ho númeru professor ne’ebé menus difísil tebes ba sira atu atende hotu estudante sira hamutuk na’in 147.

“Profesór iha ne’e ami na’in-neen, maibe ida mak hetan moras estrok tiha ona, entaun iha ne’e hela ami na’in-lima de’it. Ami sei fó hatene ba ami nia diresaun atu aumenta tán professor atu hala’o atividade ho di’ak. Tanba ami professor na’in-lima de’it, kadavéz ema nain-rua, akumula hela sala rua. Ida ne’e iha turma rua kedan,” nia informa tán.

Tuir Koordenadór ne’e  katak, MEJD aloka ona osan $80.79,17, hodi harii tán sala de aula haat, maibé sala de aula tolu sei utiliza ba hanorin nian no sala de aula ida ba professór sira uza ba eskritóriu.

Orservasaun Hatutan.com iha terrenu nota katak, daudaun ne’e kompañia balun ne’ebé kaer obra ne’e, destaka ona badaen iha terrenu atu hahú konstrusaun.

Jornalista: Rogério Pereira Cárceres