Hatutan.com, (22 Fevereiru 2022), Dili-Dirijente másimu husi partidu CNRTseidauk bele fó komentáriu relasiona ho disputa rai no uma Sede CNRT iha  Aldeia Grillus, Suku Grisenfor, Dili.

Notísia iha Relasaun: Disputa Sede CNRT, Sasin Rekoñese Matebian José Ricardo Maka Sosa

Sede CNRT. Foto/Hatutan.com

Uma no rai ne’ebé “okupa” husi partidu CNRT sai hanesan sede nasionál CNRT nian ne’e sei iha disputa nia laran entre família matebian José Jacinto da Costa Ricardo, nudár timoroan ho E.J.A Wijaya nudár sidadaun Indonéziu (WNI/warga negara indonesia).

Iha loron 21 fulan-Fevereiru ne’e, purvolta tuku 15:00 Otl, Hatutan.com tenta halo konfirmasaun via telefónika ho Vise Prezidente partidu CNRT, Virgilio Smith, maibé nia parte haruka Hatutan.com ba hasoru no entrevista de’it Sekretáriu Jerál Interinu partidu CNRT, Jacinto Rigoberto, tanba nia maka akompaña prosesu tomak husi kazu ne’e.

Bainhira Hatutan.com halo konfirmasaun ho Jacinto Rigoberto, maibé nia seidauk bele fó komentáriu tanba seidauk iha oportunidade.

Kazu ne’e hetan ona desizaun husi Tribunál primeira instánsia ka Tribunál Distritál Dili (TDD) iha loron 21 fulan-Jullu 2021, ne’ebé husu atu  E.J.A Wijaya tenke selu kustu arrendamentu ho montante $52,500.00 ba Fariz Fauzi Sagran Ricardo nu’udar oan-mane husi matebian José Jacinto da Costa Ricardo.

Notísia iha Relasaun: Sede CNRT iha Disputa

E.J.A Wijaya, la konkorda ho desizaun Tribunál primeira instánsia nian. Nune’e nia ho nia advogadu privadu, Miguel Faria halo rekursu ba Tribunál Rekursu (TR) no to’o ohin loron sei prosesa iha TR.

Iha loron 02 fulan-Novembru 2006, autór Fariz Fauzi Sagran nia aman José Jacinto da Costa Ricardo (matebian) selebra akordu ho réu E.J.A Wijaya, atu selu arrendamentu tuir saida mak estabelese ho folin $5,000.00/tinan, durante tinan-25.

Hafoin José Jacinto da Costa Ricardo mate, iha loron 09 fulan-Abríl 2008, réu  E.J.A Wijaya husik tiha nia obrigasaun atu halo arrendamentu ba autór Fariz Fauzi Sagran.

Liuhusi kontaktu pesoál réu E.J.A Wijaya  nunka kolabora no kumpre nia obrigasaun ba arrendatáriu  tuir kontratu arrendamentu ne’ebé iha no réu E.J.A Wijaya  nunka konsidera ho sasán ne’ebé nia okupa ho estatutu aluga husi autór ka  Fariz Fauzi Sagran Ricardo nia aman (matebian),  José Jacinto da Costa Ricardo.

Jornalista: Carmelita Isaac