Hatutan.com, (25 Fevereiru 2022), Dili-Comissão Nacional de Eleições (CNE) ho Sekretariadu Tékniku ba Administrasaun Eleitorál (STAE), Sesta (25/02/2022), ofisiálmente lansa bulletin votu ba eleisaun prezidensiál, 19 Marsu 2022.

Notísia iha Relasaun: STAE Husu Kada Kandidatu Aprezenta Símbolu no Fiskais 5.428

Lansamentu ofisial ne’e  hetan ona konkordánsia hosi kandidatu sira kona-bá símbolu ne’ebé tau iha bulletin votu, hafoin STAE aprezenta ba CNE, hodi halo aprovasaun no imprime iha Imprensa Nacional de Timor-Leste, Institutu Públiku (INTL,I.P) iha Colmera, Dili.

Prezidente CNE, José Belo esplika, tuir lei eleisaun prezidensiál nian artigu 38, dehan, proposta sira kona-bá símbolu ka logotipu, fotografia ne’ebé aprezenta hosi kandidatu sira, hodi tau iha bulletin votu ba eleisaun nian.

“Ohin ne’e hanesan ami apresia, aprova liu-liu kona-bá ninia material sira iha bulletin de votu ne’e. Tanba sira iha aseitasaun hotu ona, asina, modelu ikus, ne’ebé laiha tán ema ida protesta, hotu-hotu dehan ida ne’e, no ida ne’e mak di’ak liu ona, no ita hola desizaun ba imprime,” Prezidente CNE, José Belo hateten ba jornalista sira iha INTL, I.P, Colmera, Dili.

Tuir prazu tempu, Imprénsa Nacional Timor-Leste, I.P, sei imprime bulletin kandidatu sira-ne’e, durante loron 14, hahú hosi 15 fulan-Fevereiru to’o  loron 11 fulan-Marsu 2022, hafoin entrega fila ba STAE.

Prezidente CNE husu ba reprezentante kandidatu sira PR nian, seguransa inklui CNE ho STAE rasik, atu halo akompañamentu prosesu imprimatura ne’e, hodi asegura bulletin sira-ne’e, bele termina ho susesu.

Laiha Problema, Fotografia Horta ho Xanana

Tuir lista kandidatura ne’ebé aprovadu hosi Supremu Tribunál Justisa, iha kandidatu PR ba periodu 2022 to’o 2027 mak sei kompete iha eleisaun prezidensiál, iha loron 19 fulan-Marsu 2022.

Iha bulletin votu sira ne’e kandidatu ho númeru sorteiu 14, José Manuel Ramos-Horta mak tau nia fotografia hamutuk ho prezidente partidu CNRT, Kay Rala Xanana Gusmão, hasan símbolu kandidatu nian iha eleisaun mai.  Maske nune’e, prezidente CNE, José Belo afirma, laiha problema bainhira Horta nia fotografia hamutuk ho Xanana, ne’ebé sai hanesan símbolu ka logotipu ba iha boletin votu ba eleisaun prezidensiál nian.

Nia esplika, lei mós fó liberdade ba kandidatu sira atu eskolla, hato’o fotografia saida de’it, hodi sai hanesan sira-nia símbolu.

Hadi’a Kalendáriu Kampaña

Tuir planu, iha Sábadu (26/02/2022), CNE ho STAE sei realiza sorumutuk ho reprezentante sira kandidatu PR nian kona-bá oráriu ba kampaña eleitorál nian.

Diretór jerál STAE, Alcilino Bianco hateten, tuir lei, kuantidade bulletin votu ne’ebé atu prodús, bazeia ba númeru eleitór ne’ebé mak CNE ho STAE rejistadu, no aumenta tán ho 10%.

“Kuantidade ne’ebé maka tuir lei, katak sei imprime tuir numerus eleitora sira, mais 10%, tanba ita eleitora sira iha 859,000. Signifika, ita iha 85,000, ne’e 10% hosi 859,000. Ida ne’e maka aumenta tán ba iha númeru eleitora sira. Entaun, purvolta  900,000-itál bulletin votu maka sei imprime,” Alcilino Bianco hateten.

Tuir planu, iha loron 11 fulan-Marsu 2022, parte institutu públiku, gráfika nasionál, sei entrega bulletin sira ne’ebé imprimidu ba iha STAE, hodi nune’e distribui ona ba munisípiu 12 no RAEOA, no iha loron 18 fulan-Marsu, sei transporta ba iha sentru votasaun sira hotu iha territóriu TL prepara ba eleisaun iha loron 19 fulan-Marsu 2022.

Tuir dadus, oras ne’e, STAE rejista ona sentru votasaun iha TL hamutuk 2,200 iha territóriu Timor-Leste.

Jornalista: Rogério  Cárceres