Hatutan.com, (25 Fevereiru 2022), Díli- Durante ne’e, iha mundu virtuál Facebook, ema ua’in soe-lia no hewai Francisco Kalbuadi Lay katak nia halai ona ba rai-li’ur no sei la fila mai Timor-Leste tanba deskonfia envolve iha kazu balun ne’ebé rejistu iha Tribunál. 

Notísia iha Relasaun: Francisco Kalbuadi Konsentra Hela Ba Kompetisaun AFF no Orgullu Timor Marka Istória Foun

Francisco Kalbuadi Lay akompaña husi Aleixo Cobra hasoru malu ho Ministra Adaljiza Magno iha sala VIP Aeroportu Internasionál Prezidente Nicolau Lobato, Dili, 25 Fevereiru 2022. Foto/Hatutan.com

At liu tan, iha akuzasaun balun no komentáriu oioin katak Francisco Kalbuadi Lay to’o karik Timor-Leste tenke kaptura. Maibé realidade, Sesta (25/02/2022), purvolta tuku 09:00 Otl,   Francisco Kalbuadi Lay to’o ona iha Timor-Leste ho aviaun komersiál AirAsia.

Tuir observasaun Hatutan.com nian iha Aeroportu Internasionál Prezidente Nicolau Lobato, Dili, hatudu katak, eis Ministru Turizmu no atuál Sekretáriu Jerál partidu CNRT ne’e tuun husi aviaun liuhusi sala VIP, laiha autoridade Polísia ka autoridade justisa ruma mak hein iha Aeroportu atu kaptura no detein Francisco Kalbuadi Lay.

Liuhusi sala VIP, Francisco Kalbuadi Lay hamutuk ho delegasaun Federasaun Futeból Mundiál (FIFA, sigla Ingles) submete kedas ba teste PCR ba prevensaun COVID-19 nian.

Francisco Kalbuadi Lay ho delegasaun FIFA nian ne’e simu diretamente husi Vise Prezidente Federasaun Futeból Timor-Leste (FFTL) nudár mós Prezidente Asosiasaun Futeból Dili Oeste, Aleixo Cobra ho ofisial balun husi FFTL.

Delegasaun FIFA ho Francisco Kalbuadi Lay to’o iha Timor-Leste atu partisipa iha Kongresu FFTL ba dala-VIII ne’ebé sei realiza iha Otél Novo Turismo, Dili, Sábadu (26/02/2022).  

Hatutan.com tenta atu halo entrevista ho Francisco Kalbuadi Lay ne’ebé kandidata an ba prezidente FFTL periodu 2022-2026 ne’e iha sala VIP Aeroportu Internasionál Prezidente Nicolau Lobato, maibé nia parte seidauk bele koalia buat ruma ba mídia ka jornalista sira.

Francisco Kalbuadi Lay to’o fali iha Timor-Leste, 25 Fevereiru 2022. Foto/Hatutan.com

Hosi sorin seluk, prezidente Asosiasaun Dili Oeste, Aleixo Cobra ba Hatutan.com iha resintu Aeroportu hateten katak antigu membru Asembleia Konstituinte reprezenta husi  partidu  FRETILIN ne’e fila hikas mai Timor-Leste atu kompete ho kandidatu na’in-rua seluk ba iha kongresu FFTL.

Nia dehan, prezensa Kalbuadi nian mós hanesan Timoroan ne’ebé fila mai nia uma rasik hafoin hala’o tratamentu saúde no hala’o servisu importante balun iha rai-li’ur nudár Prezidente Kompetisaun AFF 2022.

“Francisco Kalbuadi Lay  mai mós tanba kompromisu ho asosiasaun sira ne’ebé durante ne’e husu nia atu kandidata an  ba Prezidente FFTL 2022-2026 para hadi’a futeból iha Timor ba oin,” Aleixo Cobra hateten.

Aleixo Cobra, tenik, Francisco Kalbuadi Lay loloos ne’e seidauk bele mai Timor-Leste ho razaun nia hanesan prezidente kompetisaun AFF 2022 no tenke partisipa iha jogu finál entre Tailándia no Vietnam, maibé tanba nesesidade no ezijénsia husi asosiasaun  apoiante sira, nune’e nia deside fila mai Timor Leste atu konkorre ba prezidente  FFTL iha kongresu FFTL nian ne’e.

Jornalista: Vito Salvadór