Hatutan.com, (08 Marsu 2022), Díli—Polísia Nasionál Timor-Leste (PNTL), liuhosi Komandu Munisípiu Díli, detein suspeitu SC ho CD iha sela detensaun tanba foti subar sasan Xineza iha Loja ida iha área Colmera, Díli.

Polísia Nasionál Timor-Leste (PNTL), liuhosi Komandu Munisípiu Díli, detein suspeitu SC ho CD iha sela detensaun tanba foti subar sasan Xineza iha Loja ida iha área Colmera, Díli. Foto/Hatutan.com.

Komandante PNTL Munisípiu Díli, Superintendente Xefe Polísia Hendrique da Costa, haktuir kronolojia katak, iha Domingu 06 Marsu  2022, maizumenus tuku 10:00, iha timoroan na’in-rua ho inisiál SC no CD, tama iha loja xineza nian ida iha área Colmera, hodi foti Xina nia sasán.

Situasaun ne’e akontese tán iha tuku 24:00 oras kalan, suspeitu na’in-rua tenta tama ba dala-rua ba iha loja ne’e hodi foti tán sasán iha loja laran.

Maibé, loja-na’in sei hadeer no konsege kaptura suspeitu sira hodi informa kedan ba PNTL liuhosi Komandu Dili ne’ebé orienta kedan ekipa patrullamentu, ba to’o iha fatin akontesimentu hodi foti suspeitu sira ba iha Eskuadra Vera Cruz hodi submeter ba prosesu. Númeru prosesu,NUC 02/10, sub-seksaun Vera Cruz 2022 nian.

“Supeitu sira, agora daudaun iha eskuadra Vera Cruz, sela detensaun munisipiu Dili nian, hodi kompleta sira nia oras 72, nune’e bele aprezenta ba iha ministériu públiku,” Komandante PNTL Munisípiu Díli, Superintendente Xefe Polísia, Hendrique da Costa informa ba jornalista sira iha kna’ar fatin, Caicoli, Tersa (08/03/2022).

Evidénsia hirak ne’ebé suspeitu sira foti mak hanesan, televizaun marka Polytron ho 24-ins, hamutuk lima, televizaun modelu Xina nian ho 62-ins ida, AC modelu Panasonic, mejiña, kadeira, sañu bee ninian, fugaun, nomós blender ho mákina kafé nian.

“Evidénsia hirak ne’e ita nian investigasaun Vera Cruz ninian, ba foti iha fatin ne’ebé mak suspeitu sira lori ba rai bá no agora daudaun evidénsia hirak ne’e iha hela eskuadra, nune’e bele aprezenta hamutuk ho suspeitu sira, depois de sira kompleta oras 72,” Komandante Hendrique hateten tán.

Suspeitu sira ne’e, ida hela iha área Na’in-feto no ida seluk hela duni iha área Colmera nian ho idade entre 30 to’o 40.

Jornalista: Rogério Pereira Cárceres