Hatutan.com (9 Marsu 2022), Díli—Provedoria Direitus Humanus no Justisa (PDHJ), rekomenda ba Comissão Nacional ba Eleição (CNE), atu foti medidas no halo xamada ba kandidatu prezidente na’in 16 ne’ebé kontinua viola dekretu lei númeru 3/2022.

Provedora Direitus Humanus no Justisa, Jesuina Maria Ferreira Gomes. Foto/PDHJ.

Hosi rezultadu monitorizasaun PDHJ detekta iha pontus importante sia (9) ne’eb’e sei kontinua mosu iha prosesu kampaña liu-liu irregularidade ne’ebé komete hosi kandidatu sira kona-bá mudansa oráriu no kontinua utiliza lia-fuan provokativu.

Notisia iha Relasaun:CNE Sei Keixa Funsionáriu Públiku Balun Abandona Serbisu no Partisipa Kampaña

Bazeia ba rezultadu monitorizasaun PDHJ, primeiru kandidatu kontinua halo mudansa oráriu kampaña sen aprovasaun CNE, segundu kampaña hosi kandidatu númeru 14 ho 8 ne’ebé halo iha kampu Viqueque besik resintu eskola ne’ebé perturba prosesu aprendizazen, terseiru durante kampaña barak la kumpri regras prevensaun Covid-19, kuatru kontinua la respeita kódigu estrada hodi la uza kapasete, sen xapa matrikula, kanu resin, kintu kampaña kontinua uza lia-fuan provokativu ne’ebé iha tendénsia ba insulta, Sestu, funsionáriu públiku involve iha kampaña iha oras servisu liu-liu iha Munisipiu Covalima, Setimu, apoiantes uzu patrimóniu Estadu hanesan motór, Oitavu mosu insidente iha Baucau no Viqueque ne’ebé halai liu ba krime tanba ne’e iha ona Polisia no Ministériu Públiku no ikus liu Nonu maka partisipasaun labarik sei kontinua akontese liu-liu iha kampaña ho tipu komisiu ne’ebé sei involve labarik iha dansa kultural, tara tais, poezia no iha labarik balun uza atributu kandidatu.

Advertisement

“Tanba ne’e husu ba CNE atu foti medidas ka xamada ba kandidatu PR ne’ebé viola dekretu Governu nu 3/2022,” Provedora Direitus Humanus no Justisa, Jesuina Maria Ferreira Gomes hateten liu hosi konferénsia imprensa ne’ebé hala’o iha edifisiu PDHJ, Kuarta (09/03/2022).

Iha dekretu Governu 3 /2022 artigu 10, katak bainhira kandidatu atu halo alterasaun ba oráriu kampaña presiza komunika ho CNE antes loron lima no artigu 12 esplika labele halo kampaña besik edifisiu reliziozu, instalasaun militár no labele perturba prosesu aprendizazen.

Bazeia ba irregularidade hirak ne’e, PDHJ rekomenda ba CNE, PNTL no Instituisaun para Defeza dos Direitus da Crianca (INDDICA) atu foti kualker irregularidade ne’ebé akontese iha prosesu kampaña, tanba tuir PDHJ katak PNTL mós seidauk halo intervensaun másimu ba ema ne’ebé viola kódigu estraga.

PDHJ laiha podér atu foti desizaun ba irregularidade ne’ebé akontese iha kampaña, tanba PDHJ hanesan órgaun ne’ebé atu halo monitorizasaun, supervizaun hodi hato’o rekomendasaun ba instituisaun relevante hanesan CNE, Komisaun Funsaun Publika, PNTL no instituisaun relevante sira seluk.

Jornalista: Carmelita Isaac

Advertisement