Hatutan.com (22 Marsu 2022), Díli—Remodelasaun ne’ebé VIII Governu Konstitusionál halo iha periúdu ikus mandatu, ho objetivu atu halo buat barak no hakarak halo di’ak liu tán.

Membru Governu na’in-haat ne’ebé simu pose iha Tersa (22/03/2022). Foto/Hatutan.com.

“Ajustamentu ezekutivu ida ne’ebé, maski implementa de’it iha tinan ikus mandatu Governu nian, bazeia ba kompromisu ne’ebé metin atu halo buat barak no halo di’ak liu tan, hodi atinje rezultadu di’ak sira iha meta no objetivu sira dezenvolvimentu sustentável nian ne’ebé asume hosi Governu hamutuk ho sidadaun sira no país,” Primeiru Ministru (PM), Taur Matan Ruak, hateten iha diskursu serimónia tomada de pose ba membru Governu na’in-haat iha Palásiu Prezidensiál Nicolau Lobato, Tersa (22/03/2022).

Notisia iha Relasaun:Lú Olo Fiar Membru Governu Na’in-haat Sei Benefisia no Hadi’a Dezempeñu Governamentál

Remodelasaun atu kontribui hodi dezenvolve reforma lejizlativa, operasionál no administrativa, importante atu hakat liu difikuldade sira ne’ebé sei eziste iha terrenu no rezolve problema sidadaun, família no komunidade sira-ne’ebé afetadu hosi dezastre naturál sira.

Advertisement

Reforma institusionál sira ne’ebé ho objetivu atu introdús modelu ida ne’ebé lais, efikás no efisiente liu ba supervizaun, monitorizasaun no avaliasaun iha implementasaun polítika Governu nian, ne’ebé justifika remodelasaun ba ezekutivu.

Situasaun emerjénsia ida ne’ebé kleur tebes, tanba burokrasia boot iha sistema aprovizionamentu, komunikasaun, interpretasaun lejizlativa no koordenasaun entre entidade públika barak ne’ebé envolve, ne’ebé justifika introdusaun ba reforma institusionál foun ne’ebé sei la’o hela.

“Dezafiu sira ne’ebé ita sei ultrapasa, atu renova ha’u-nia kompromisu no Governu Konstitusionál VIII nian, hodi kumpre meta, objetivu no prioridade sira ne’ebé define ona iha ita-nia programa Governu nian, tuir Planu Estratéjiku Dezenvolvimentu Nasionál nian no dezeju sira ba moris-di’ak, progresu no seguransa ba timoroan sira hotu,” Xefe Governu ne’e subliña.

Dezafiu foun sira ba retoma no rekuperasaun ekonómika no sosiál, ba normalidade hafoin-Covid-19 ida ne’ebé dezenvolve, ezije ajustamentu ida ba estrutura Governu nian ne’ebé adapta di’ak liu ba realidade interna no externa, atu bele aproveita oportunidade foun sira hosi faze ida ne’ebé pozitiva liu ba dezenvolvimentu nasionál.

Faze ida ne’ebé promisora liu ne’ebé ejize foku renovadu ida, aliñamentu internu no koezaun ida ba esforsu sira iha área justisa, finansas, obras públikas no Asuntu Kombatente ba Libertasaun Nasionál.

Advertisement

Área governativa fundamentál haat, atu bele aselera ritmu di’ak ba reforma judisiária no Jestaun Finansas Públikas, nune’e mós iha volume no intensidade ba Ezekusaun Obras Públikas nian ne’ebé sei implementa iha terrenu.

Volume obra sira ne’ebé intensu no programadu iha ámbitu rekonstrusaun infraestrutura sira ne’ebé atinje hosi dezastre naturais, no ne’ebé inklui iha planu rekuperasaun Pandemia Covid-19 nian, ne’ebé tranzita ona hosi tinan kotuk ba tinan ida-ne’e, iha setór estratéjiku saúde, edukasaun formasaun profisionál, konetividade no protesaun sivíl nian, no ne’ebé ita hakarak atu dezenvolve iha fulan hirak oin-mai.

Tuir Primeiru Ministru katak, remodelasaun ida ne’ebé akontese, bainhira hahú síklu foun Planeamentu no Orsamentasaun ba Tinan Fiskál 2023 nian, identifikasaun no realizasaun meta indikadora, objetivu no prioridade sira ne’ebé ezijente liu hodi avalia índise sira ba moris-di’ak no dezenvolvimentu umanu, saudável no sustentadu liu, ho nível kapasitasaun no koñesimentu ba rekursu umanu sira di’ak liután, hodi kumpre objetivu nasionál ne’ebé boot atu transforma Timor-Leste ba país ida modernu, prósperu no seguru, ho padraun sira rendimentu nian ne’ebé justu, ekuitativu no dignu liu.

Membru Governu na’in haat emposadu ne’e mak hanesan Ministru  Justisa, Tiago Sarmento,  Ministru Obras Públikas,  Abel Pires da Silva,  Vise-Ministru  Finansas, António Freitas no Sekretáriu  Estadu ba  Asuntus  Kombatentes Libertasaun Nasional,  Júlio da Conceição Loro Mesak.

Jornalista: Vito Salvadór

Advertisement