Hatutan.com (23 Marsu 2021), Dili-Tribunál Distritál Dili (TDD) notifika Diretór  J. Vision Travel Unip.Lda ho inisiál DFS maibé to’o agora seidauk hetan nia paradeiru.

Liuhusi primeiru julgamentu iha TDD, Kuarta (23/03/2022),  Juiza singulár Ercilia de Jesus, aplika krime burla agravadu ne’ebé deskonfia komete husi arguidu DFS tanba fa’an tiketi falsu viajen Dili-Portugal ho montante $3.900.00 ba lezada Teresa de Jesus Oliveira Rodrigues.

Iha primeiru julgamentu ne’e, Tribunál liu husi Juiza singulár Ercilia de Jesus deside seidauk bele rona arguidu ho razaun,  maske Tribunál notifika ona maibé la hatene arguidu nia paradeiru.

Ho razaun ne’e, Tribunál adia hikas julgamentu ba loron seluk hodi orienta mós ba PNTL atu buka arguidu nia paradeiru.

Tuir akuzasaun husi MP katak arguidu hanesan diretór no na’in ba kompañia ka ajénsia J. Vision Travel. Unip Lda, ne’ebé hala’o atividade fa’an billete aviaun, maibé iha loron 25 fulan-Juñu 2019, lezada hamenu billete aviaun ba ema na’in rua, liu husi J. Vision Travel ho via e-mail hodi uza ba viajen ba mai Dili-Portugal iha loron 28 fulan-Jullu 2019 ho valór $1.950.00 kada ema ho total ba ema na’in rua hamutuk $3.900,00.

Lezada haruka osan refere ba ajénsia J. Vision Travel nia konta bankária iha loron 28 fulan-Juñu no arguidu haruka billete rua ba lezada nia e-mail, maibé billete rua refere husi Bali ba Portugal de’it, maibé la fó billete Dili ba Bali.

Iha loron 13 fulan-Jullu, ema publika iha media sosial Facebook katak, billete ne’ebé arguidu fa’an falsu, tanba ne’e lezada ho nia kolega inklui família halo konfirmasaun liu husi internet on line aviaun Qatar, konfirma katak billete rua ne’ebé lezada sosa iha arguidu nia ajensia J. Vision Travel ne’e la eziste iha sítiu online aviaun Qatar nian, tanba ne’e iha loron 20 fulan-Jullu, lezada kontaktu arguidu via WhatsApp halo konfirmasaun kona-bá informasaun billete falsu ne’e, maibe arguidu hatan billete la falsu, maibé problema iha sistema komputador no arguidu sempre promete ba lezada liuhusi WhatsApp maibé iha loron 26 Jullu 2019 atu prepara billete foun ba lezada, maibe la realiza to’o agora.

Iha loron 3 Setembru 2019, lezada ho nia kolega Paula Oliveira buka tuir arguidu liu husi ajuda husi Polísia no autoridade suku no ikus mai konsege hasoru arguidu liu husi mediasaun ne’ebé halo iha sede Suku Bemori no arguidu rekoñese nia sala no promete fó fila lezada nia osan, maibé to’o agora arguidu la fó fila, tanba ne’e Ministériu Públiku akuza arguidu ba pratika krime burla agravadu ne’ebé previstu iha artigu 266 husi kódigu penál TL.

Jornalista: Carmelita Isaac