Hatutan.com, (28 Marsu 2022), Díli—Komandu Polísia Nasionál Timor-Leste (PNTL) Munisípiu Baucau, konsege rejista insidente balun durante períudu eleisaun Prezidensiál, ne’ebé konsidera hanesan krime eleitorál no situasaun ne’e ekonraza tebes instituisaun ne’e atu serbisu másimu liu tán bainhira akontese segunda ronde no mós eleisaun sira tuir mai.

Komandante PNTL Munisipiu Baucau, Superintendente Polisia, António de Sá. Foto/MI.

Insidente sira ne’ebé konsidera hanesan krime eleitorál mak hanesan, iha sábadu 19 Marsu 2022 oras kalan, PNTL Baucau halo detensaun ba joven mane ida tanba tenta halo disturbiu iha Sentru Votasaun EBC 3°Siklu Baucau Vila, hodi perturba prosesu kontajen votu hosi Brigada sira STAE nian.

Notisia iha Relasaun:Eleisaun Prezidensiál, PNTL Enfrenta Difikuldade Barak

“Iha loron eleisaun nian iha individu balun ne’ebé tenta atu halo perturbasaun iha sentru votasaun, liu-liu iha eskola 30 Siklu Baucau nian, no autór kalan ne’e ita kaer kedan. Ne’e iha natureza flagrante delitu, aplika kedas 72 oras ba nia,” Komandante PNTL Munisipiu Baucau, Superintendente Polisia, António de Sá informa ba jornalista sira hafoin partisipa avaliasaun jerál kona-bá eleisaun PR iha primeira volta, iha Suai Room, Timor Plaza, Díli, Segunda (28/03/2022).

Advertisement

Hafoin kumpri oras 72, Komandu PNTL Baucau enkamiña kedan kazu ne’e ba Ministériu Públiku (MP) hodi prosesa tuir lei.

Liuhosi prosesu primeiru interrogatóriu iha Tribunál Distritál Baucau (TDB), tribunál aplika pena prizaun ba tinan ida.

“Maibé nia multa $1.250 hosi hahalok ne’ebé nia halo no ne’e desizaun tribunál nian,” Komandante António de Sá hateten tán.

Iha mós kazu seluk ne’ebé mak akontese iha dalan ba Postu Administrativu Baguia nian. Kazu insidente ne’e mosu, bainhira ekipa PNTL, CNE no brigada sira STAE nian transporta sasán sensitivu ba iha Baguia.

Iha dalan, iha grupu joven balun ne’ebé mak uza atributu hosi kandidatu Preizidente Repúblika Independente balun ne’ebé mak sira hemu lanu, depois halo perturbasaun iha dalan públiku maibé autoridade seguransa konsege paraliza kedan, depois fila-fali bai ha situasaun normál.

Advertisement

Iha atuasaun PNTL nian ne’e, iha mós individu ka joven balun ne’ebé halo hela video ba asaun intervensaun ne’ebé halo, hodi públika iha média sosiál facebook, maibé utiliza ID Falsu. Atitude hosi sidadaun joven ida ne’e, ho intensaun atu dezakredita Polísia nia servisu iha terrenu.

Maske nune’e, iha tempu ne’ebá, PNTL halo kedan kapturasaun ba suspeitu ikus mai nia rekoñese katak, nia mak divulga duni ninia video sira ne’e.

Ba eleisaun PR iha Segunda Volta, komandante António de Sá promete sei planeia di’ak liután hodi garante eleisaun ne’ebé seguru no hakmatek ba populasaun hotu iha Baucau.

Atu garante pás ho estabalidade iha eleisaun tuir-mai, la’ós Polisia nia servisu mesak, maibé ema no autoridade hotu-hotu, inklui ekipa susesu sira hosi kandidatu PR nian, atu eduka nia militante no apoiante tomak, respeita mós ema seluk nia liberdade iha partisipasaun polítika.

“Iha segunda ronde ha’u fiar katak, métodu sira ne’e ita sei utiliza nafatin. Ita sei mellora liután buat sira ne’ebé sai frakeza iha faze dahuluk nune’e bele hadi’a liután. Ida ne’e mak ita husu no ida ne’e kolaborasaun hosi entidade hotu-hotu nian,” Komandante António de Sá promete.

Advertisement

Difikuldade ne’ebé komandu PNTL Baucau hasoru iha terrenu maka, limitasaun rekursu umanu, ekipamentu no difikuldade seluk kondisaun estrada hosi kapitál to’o sentru votasaun sira, aat grave.

Maski nune’e, la hamate espíritu pesoál seguransa sira iha Baucau ne’ebé sempre prontu iha kualkér oras hodi fó seguransa metin ba komunidade ne’ebé oras-ne’e daudaun situasaun jerál iha munisipiu  la’o ho kontroladu.

Jornalista: Rogério Pereira Cárceres

Advertisement