Hatutan.com, (01 Abríl 2022), Dili-Organizasaun Feto iha Polítika (CAUCUS) dezafia Sekretáriu Estadu Igualdade no Inkluzaun (SEII) foun, Maria do Rosário Fátima Correia, atu halo ezersísiu no halo influensia polítika iha Orsamentu Jerál Estadu (OJE) hodi prevee osan ba organizasaun feto, liu-liu hodi reativa rede referral ne’ebé hare ba asuntu violénsia doméstika bazeia ba jéneru no violénsia hasoru feto no labarik feto iha munisípiu 13, inklui Rejiaun Administrativu Espesiál Oé-Cusse (RAEO).

Notísia iha Relasaun: Maria ho Eldino Lakohi Promete Tanba Mandatu Tinan Ida De’it

Inan feto sira ne’ebé ho kbiit rasik halo negósiu ki’ik fa’an modo iha merkadu hodi sustenta nia uma-laran. Foto/Hatutan.com

CAUCUS haree katak maske rede referral estabelese ona iha munisípiu 13 inklui RAEOA,  maibé ladún funsiona ho di’ak tanba laiha apoiu finanseiru husi Governu liu-liu SEII.

“Durante ne’e rede referral tolu hanesan iha Ermera, Viqueque no Bobonaro hetan de’it apoiu finanseiru husi parseiru implementadór husi UN WOMAN no husi SEII laiha, tanba ne’e presiza rekursu finanseiru atu reativa hikas rede referral iha munisípiu ho RAEOA, nune’e bele hala’o servisu di’ak liu tan no bele kobre area remota, tanba ne’e ho SEII foun karik barani influensia polítika OJE hodi bele prevee montante orsamentu ruma hodi reativu rede referral  ne’e atu servisu ba advokasia redús violénsia doméstika iha ita rai,” Diretora Caucus, Maria da Costa Exposto ba Hatutan.com via telefónika, Sesta (01/04/2022).

Organizasaun ne’e, la ezije atu halo mudansa boot, maibé koko halo avaliasaun ba polítika ne’ebé efisiénsia husi SEII sesante no liu-liu ba transformasaun interese komún ne’ebé durante ne’e ladún tau importánsia no la valoriza organizasaun feto nia proposta ruma, liu-liu kona-bá projetu inisiativa SPOTLIGT ne’ebé besik remata.

CAUCUS rekomenda atu halo mós mudansa liu-liu labele tau de’it importánsia ba grupu feto partidu polítiku, maibé tenke akomoda interese organizasaun feto hotu hodi solusiona problema ne’ebé organizasaun feto sira nian enfrenta.

Iha serimónia tomada  pose ba Sekretária Estadu Igualdade no Inkluzaun (SEII), Maria do Rosário Fátima Correia, promete  kontinua ho planu asaun nasionál Governu nian hodi kontra violénsia doméstika, liu husi reforsa servisu rede referral ne’ebé antes ne’e eziste ona.

Jornalista: Carmelita Isaac