Hatutan.com, (01 Abríl 2022), Díli—Komandu Polísia Nasionál Timor Leste (PNTL) planeia ona atu halo destakamentu ba membru sira iha sede Partidu Congresso Nacional Reconstrução Timorense (CNRT) ho Comitê Centrál da Fretilin (CCF) hodi evita violénsia durante kampaña eleitóral no eleisaun Prezidensiál segunda volta.

Komandante Operasaun Nasionál PNTL, Superintendente Xefe Polísia, Pedro da Costa Belo. Foto/PNTL.

Desizaun ne’e komandu PNTL foti, tanba haree ba esperiénsia iha kampaña eleitóral primeira volta, iha militante hosi partidu balun ba halo distúrbiu iha sede CNRT, iha Bairro dos Grilhos, Díli.

Notisia iha Relasaun:FRETILIN-KHUNTO Saling Lempar di Baucau, Militan FRETILIN Halangi CNRT di Manufahi

Insidente ne’e, rezulta militante ida hetan kanek iha ulun, tanba hetan tuda ho fatuk, bainhira kampaña ikus hosi kandidatu Francisco Guterres Lú Olo nian, iha Tasi-tolu, Díli iha 16 Marsu 2022.

Advertisement

“La’ós ba de’it iha sede, maibé ba fatin risku sira ne’ebé mak ami identifika, liu-liu relatóriu hosi intelijénsia sira mai duni, katak iha fatin risku sira ne’e ami sei koloka membru sira bá permanente, hodi bele asegura ema, nomós sasán sira,” Komandante Operasaun Nasionál PNTL, Superintendente Xefe Polísia, Pedro da Costa Belo hateten hafoin serimónia entrega karreta, iha Kuartél Jerál PNTL, Caicoli, Díli, Sesta (01/04/2022).

Komandu mós koloka ona karreta operasionál hamutuk 32 ba komandu munisípiu sira, atu bele utiliza hodi asegura atividade kampaña no Eleisaun Prezidensiál segunda volta nian, ne’ebé tuir oráriu sei hahú iha 02 to’o 16 Abril no eleisaun iha 19 Abril 2022.

Desizaun apoia tán karreta hirak ne’e, tanba avaliasaun jerál kona-bá kampaña no eleisaun Prezidensiál iha primeira volta, Komandu munisípiu no unidade sira, maioria aprezenta problema menus transporte, liu-liu karreta ba operasaun ninian.

“Ho frakeza sira ne’ebé mak ita hetan iha primeira ronde, maka ohin ita iha ona solusaun balun, la’ós atu kompleta hotu, maibé ita bele reforsa frakeza balun ne’ebé mak kolega sira hosi munisipiu no mós unidade sira enfrenta,” Superintendente Xefe Polísia, Pedro da Costa Belo hateten.

Komandu PNTL koloka karreta operasionál hamutuk 32 ba komandu munisípiu sira, atu bele utiliza hodi asegura atividade kampaña no Eleisaun Prezidensiál segunda volta nian, Sesta (01/04/2022). Foto/Hatutan.com.

Karreta hirak-ne’e, Komandu aluga hosi kompañia balun iha Díli, nune’e nia husu ba membru sira liu-liu kondutór ne’ebé kondús karreta tenke halai ho kuidadu, utiliza didi’ak, atu kondisaun bele di’ak nafatin. 

Kona-bá kombustível (mina) bainhira hotu, komandante munisípiu ho unidade sira tenke hato’o relatóriu ho karáter urjénsia, nune’e parte administrasaun no lijístika Komandu PNTL nian bele responde ho lalais.

Advertisement

Tuir oráriu hosi Sekretáriadu Tékniku ba Administrasaun Eietóral (STAE), ho Comissão Nacional de Eleições (CNE), fó sai katak, kampaña eleitóral sei realiza durante semana rua, hahú hosi loron 02 to’o 16 fulan-abril tinan ne’e.

Tuir planu hosi komandu PNTL katak, iha 17 Abril  sei iha tán formatura jerál ida hodi halo dezlokasaun membru sira ba apoia eleisaun iha munisipiu hotu iha territóriu nasionál.

Nune’e mós Komandante Administrasaun Jerál PNTL, Superintendente Xefe José Soares informa, orsamentu hosi governu ne’ebé alokadu ba komandu PNTL, liu-liu atu asegura kampaña no eleisaun segunda volta ho montante $339.000. Hosi orsamentu ne’e, $230.000 utiliza ba aluga karreta, no $100,000 aloka ba sosa kombustível.

“Karreta 32 ne’e alugadu, no orsamentu ne’ebé mak koloka iha PNTL ne’e, ho montante $230.400. Orsamentu sira ne’e, kobre ba iha primeira no segunda faze kampaña eleitóral,” nia hateten.

Totál kareta operasionál hamutuk 32 ne’e, fahe ba Munisipiu Aileu rua, Ainaro ida, Baucau ida, Bobonaro ida, Covalima ida, Dili ida, Ermera ida, Manatuto rua, Manufahi ida, Lautem ida, Liquiça ida, Viqueque ida, Unidade Especial da Policia (13), Unidade Patrullamentu Fronteira ida, Unidade Policia Marítima ida, Servisu Informasaun Polisia rua, no Stand By ida.

Advertisement

Antes ne’e, Komandu Jerál simu ona mós apoiu karreta hamutuk 36 hosi patrimóniu Estadu, liuhosi Ministériu Finansa nian (MF), no oras ne’e kolokadu iha munisipiu hotu, no unidade sira.

Jornalista: Rogério Pereira Cárceres