Hatutan.com (04 Abríl 2022), Dili–Tribunál Distritál Dili (TDD), Segunda (04/04/2022), la konsege hala’o primeiru julgamentu ba kazu partisipasaun ekonomia, pekulatu no abuzu de konfiansa, ne’ebé deskonfia envolve  Francisco Kalbuadi Lay.

Notísia iha Relasaun: Ministériu Públiku Husu Tribunál Obriga Kalbuadi Hela iha Uma

Francisco Kalbuadi Lay. Foto/Espesiál

TDD labele hala’o primeiru julgamentu ho razaun rua; primeiru tanba juis prosesu moras no sei halo tratamentu saúde iha rai-li’ur, segundu, arguidu sei iha prazu loron 15 nia laran hodi halo kontestasaun ba TDD, tanba Tribunál notifika arguidu iha loron 28 fulan-Marsu, ho nune’e, prazu kontestasaun sei remata iha loron 12 fulan-Abríl 2022.

Defeza Fernando Carvalho ne’ebé fó asisténsia legal ba Francisco Kalbuadi Lay hateten,  bainhira prosesu ne’e sei iha faze kontestasaun nia laran maka Tribunál seidauk bele halo julgamentu.

“Julgamentu ohin ne’e sei iha prazu loron 15 nia laran hodi halo kontestasaun,” Fernando Carvalho ba jornalista sira iha TDD. Ho razaun refere, TDD deside adia julgamentu sen data hodi hein prazu kontestasaun remata.

Antes ne’e, TDD aplika ona medida koasaun Termu Identidade Rezidénsia no proibisaun ba auzénsia no iha loron 25 fulan-Fevereiru liu husi Prokuradór Rogério Viegas notifika ona Francisco Kalbuadi Lay hodi informa katak prosesu investigasaun husi MP remata ona no submete ona akuzasaun ba TDD.

 Jornalista: Carmelita Isaac