Hatutan.com, (06 Abríl 2022), Díli- Ekipa susesu Segredu Surpreza  ne’ebé iha eleisaun prezidensiál (Eprez) primeira volta fó apoiu ba kandidatu  Prezidente Repúblika, Tenente Jenerál reformadu, Lere Anan Timur (LAT) deklara fó apoiu ba Francisco Guterres “Lú Olo” iha eleisaun segunda volta, 19 fulan-Abríl 2022.

Ekipa susesu Segredu Surpreza deklara fó apoiu ba Francisco Guterres “Lú Olo”. Foto/Hatutan.com

Porta vóz ekipa susesu Segredu Surpreza, Virgilio Faculto Ximenes, liuhusi konferénsia imprensa iha Sede Nasionál ekipa susesu Kandidatu Prezidente Repūblika, Frnacisco Guterres “Lú Olo” nian iha Luz Clarita, Dili, afirma mós katak sira-nia ekipa ne’e sei lori votu 5.992 hodi vota ba Lú Olo hodi garante vitória Lú Olo nian iha Munisípiu Díli.

Nia hateten hateten, ekipa Segredu Surpreza halo desizaun konjunta atu fó votu konfiansa ba kandidatu Prezidente Repúblika Francisco Guterres “Lú Olo” iha eleisaun segunda volta tanba kandidatu ne’e nudár lider ida ne’ebé tane as Konstituisaun RDTL no hametin unidade nasionál no garante estabilidade no pás iha Timor Leste liu husi dalan promove diálogu.

“Ami konsidera katak Lú Olo nudár lider ida ne’ebé sei garante funsionamentu órgaun Estadu, mós ka livre husi korrupsaun  no sei hakotu impasse polítika hodi lori povu ba prosperidade,” Virgilio Faculto Ximenes hateten.

Ekipa Segredu Surpreza garante sei la fó votu ba kandidatu prezidente repúblika ne’ebé ho intensaun atu dissolve parlamentu tanba ida ne’e hanesan la respeitu ba separasaun podér entre órgaun soberanu sira ne’ebé mak eziste iha Timor Leste.

“Ami konsidera deklarasaun polítika husi kandidatu balun ne’e hakarak hanaruk krize ne’ebé sei rezulta povu mak vítima no sei terus ba beibeik,” nia akresenta.

Ekipa Segredu Surpreza Díli mai husi kór partidu polítiku oin-oin hanesan partidu FRETELIN, KHUNTO, PLP. OS VERDE, PD no organizasaun masa hanesan Asosiasaun Maubere Oan (AMO), Movimentu Juventude Dezempregu, Movimentu Juventude Independente hamutuk ho organizasaun rezisténsia sira hanesan kaixa Unidade no kaixa uniaun.

Rezultadu votu ne’ebé Tenente Jenerál Reformadu Lere Anan Timur hetan iha eleisaun primeira volta loron 19 fulan-Marsu liubá hamutuk 5.992 votu, kompostu husi postu administrativu Cristo Rei total votu 3.396, postu administrativu Nain Feto votu 950, postu administrativu Vera Cruz ho votu 1.355 no postu Metinaru ho total votu 291.

Jornalista: Vito Salvador