Hatutan.com, (20 Abríl 2022), Díli—Federasaun Futeból Timor Leste (FFTL) ho Emanuel FC inklui adeptu no amante futeból Timor Leste, lakon jogadór potensiál ida iha selesaun nasionál under 19 (U-19), Filomeno da Conceição Sávio ho naran estimadu Fifi, hafoin hetan asidente ho motorizada iha dalan públiku postu administrativu Vemase, munisípiu Baucau.

Matebian jogadór, Filomeno da Conceição Sávio. Foto/LFTL.

Prezidente Emanuel FC, Aleixo do Carvalho Monteiro, via Telefonika ba Hatutan.com sente triste ho novidade moruk liuliu asidente ne’ebé ikus mai jogadór ne’e tenke lakon vida.

Hafoin simu notísia ne’e nia diretamente tenta halo komunikasaun direta ho jogadór Fifi maibé la atende telefone no ikus mai komesa simu informasaun via whatsapp no facebook katak Fifi mate tanba asidente iha dalan públiku Diresaun Vemase- Dili.

“Ha’u la fiar tanba ami nia jogadór ne’e hanesan mós jogadór íntimu iha selesaun nasionál sub-19 no nia lisensa atu ba vota maibé fila mai Díli mak hetan asidente iha dalan no nia vida labele salva,” Aleixo do Carvalho Monteiro hateten.

Família boot Emanuel FC hamutuk ho adeptu sei la haluha kontribuisaun ne’ebé Fifi fó liu hosi kontribuisaun iha kampu.  

Matebian hamutuk ho kolega jogadór tomak iha kolaborasaun di’ak ho treinadór no manajementu tomak klube nian halo esforsu hodi lori Emanuel FC promovidu hosi segunda divizaun ba primeira divizaun ho estatutu hanesan klube kampiaun tasa segunda divizaun époka 2021.

Iha parte seluk Prezidente FFTL, Francisco Martins Soares Jeronimo hateten Filomeno da Conceição Sávio hanesan jogadór fini ne’ebé FFTL iha liu hosi programa grassroots ne’ebé Federasaun Timor Leste kria hodi buka fini jogadór potensiál ba selesaun nasionál.

Jogadór talentozu ne’e la’ós foin mak reforsa ekipa selesaun nasionál ho kategoria idade 19, maibé antes ne’e Filomeno da Conceição Sávio reforsa ona selesaun nasionál under 16 no reprezenta ona Timor Leste iha Thailándia.

“FFTL sente lakon jogadór di’ak ida ne’ebé sai hanesan esperansa nasaun nian iha futuru,” Francisco Martins Soares Jeronimo, hateten iha edifisiu FFTL, Díli, Kuarta (20/04/3022).

Hafoin enkontru Francisco Jerónimo sei haruka ekipa ida reprezenta FFTL hodi ba presta sentidu kondolénsia ba matebian molok ba haloot iha fatin deskansa ikus nian.

Iha fatin hanesan, Treinadór Emanuel FC, Emilio da Silva konsidera Fifi nu’udár jogadór potensiál ba selesaun nasionál iha futuru.

To’o oras ne’e Timor Leste laiha avansadu ka atakante puru (striker murni) ho Fifi nia mate lori tristeza boot ba familia boot futeból Timor Leste liuliu ba selesaun nasionál.

“Ita iha Timor ne’e laiha jogadór ida ne’ebé mak bolu striker murni tanba ne’e ita nia futeból Timor Leste lakon jogadór potensiál diak ida hanesan Fifi,” Emiliano Ribeiro hateten.

Iha pájina ofisiál Liga Futeból Timor Leste (LFTL), hato’o sentimentu triste tanba familia boot futeból Timor Leste lakon futebolista talentozu ne’ebé sei sai hanesan erói foun TL iha futuru.

“Familia boot LFTL hato’o sentidu kondolénsia ba familia matebian ne’ebé lakon nia oan, alin no, forsa nafatin ba familia hodi hasoru situasaun difisil ida ne’e,” Hatutan.com sita komunikadu iha pájina ofisiál facebook LFTL.

Sentimentu tristeza mai mós hosi klube jigante Karketu Dili FC no Boavista FC hodi hato’o mós sira nia solidariedade no sentidu kondolénsia ba familia matebian atu nafatin iha korajen simu realidade moruk ida ne’e.

Jornalista: Vito Salvadór