Hatutan.com, (23 Abríl 2022), Díli-Polísia Nasionál Timor Leste (PNTL) hamutuk ho komisaun organizadora hosi Ministériu Administrasaun Estatál (MAE) hahú halo koordenasaun téknika kona-bá seguransa bá serimónia ofisiál  tomada  posse Prezidente Eleitu, José Manuel Ramos-Horta, ho mós komemorasaun loron Restaurasaun Independénsia bá dala-XX iha 20 Maiu iha Tasitolu, Díli.  

Lee Mós : Governu Aloka $430,000 Bá Preparasaun Terrenu Festa 20 Maiu iha Tasitolu

Polísia Nasionál Timor Leste (PNTL). Foto/Média PNTL

Portavós Komandu Jerál PNTL, Superintendente Xefe Armando Monteiro informa, reuniaun sira kona-bá koordenasaun seguransa ba eventu rua importante ne’e, partisipa direta hosi komandante Operasaun Nasionál, Superintendente Xefe Polisia, Pedro Belo, ho ekipa komisaun organizadora hosi MAE, no oras ne’e mós, reuniaun sei la’o namanas ho parte relevante sira.

“Bainhira finalidade hosi reuniaun ida-ne’e, komandu sei dezeña planu, oinsá atu bele fó seguransa di’ak liubá serimónia  tomada de posse Xefe Estadu eleitu, tantu mós bá selebrasaun tinan -20 restaurasaun independénsia,” Superintendente Xefe Armando Monteiro hateten ba jornalista sira  liuhusi konferénsia imprensa iha Kuartél Jerál PNTL, Caicoli, Díli, Sábadu (23/04/2022).

Portavós komandu jerál PNTL ne’e informa mós katak, oras ne’e komandu PNTL rasik halo ona enkontru ho adidu seguransa hosi Portugál nian iha Timor-Leste, kona-bá seguransa ba bainaka importante sira hosi estranjeiru, liu-liu Xefe Estadu Portugál, Marcelo Rebelo de Sousa rasik, ne’ebé tuir planu sei partisipa mós iha serimónia importante rua ne’e.

“Téknikamente, hosi nasaun balu mai aprezenta ona, tempu badak, ekipa avansadu sei mai halo koordenasaun, oinsá atu PNTL bele prepara ninia aan ho elabora ninia planu fó seguransa bá ita-nia alta entidade sira, hosi rai seluk ne’ebé mak mai partisipa serimónia sira 20 Maiu 2022,” Armando Monteiro informa tán.

Hosi parte FALINTIL-Forsa Defeza Timor-Leste (F-FDTL) nian, tuir informasaun ne’ebé Hatutan.com asesu katak, iha loron 22 fulan-Abríl, parte komisaun organizadora sira MAE nian hato’o ona pedidu ba Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek”, hodi hein ninia despaxu ruma áa parte Operasaun Komandu F-FDTL nian, molok halo destakamentu membru sira iha ámbitu seguransa20 Maiu nian.

Jornalista: Rogério Pereira Cárceres