Hatutan.com, (10 Maiu 2022), Díli-Rai no uma Estadu ne’ebé atualmente ENSUL MECI arrenda hodi halo konstrusaun Dili Finacial Businees Center (DFBC) sai disputa entre empreza estranjeiru sira.

Lee Mós : TR Deside Rai Ne’ebé ENSUL MECI Arrenda Husi Governu Pertense Rai Privadu

Konstusaun DFBC iha rai ho uma Estadu ne’ebé hamosu disputa entre SAPT ho ENSUL MECI. Foto/Hatutan.com

Rai no uma Estadu nian ne’e, iha tinan sira liubá, empreza ida ne’ebé deskonfia hosi estranjeiru ho naran Sosiedade Agríkola Patria e Trabalho (SAPT) halo arrendamentu bá Estadu bá interese investimentu.

Hetan tiha kontratu arrendamentu husi Estadu, SAPT fó hikas arrendamentu bá empreza estranjeiru hotu ho naran  ENSUL MECI okupa hodi halo konstrusaun Díli Financial Business Center (DFBC) ne’ebé sei pertense bá rai ho uma Estadu Timor Leste nian.

Iha inísiu estabelese akordu arrendamentu  entre parte sira-ne’e, ENSUL MECI selu arrendamentu bá SAPT, maibé to’o dalan klaran ENSUL MECI lakohi ona selu arrendamentu tanba rai ho uma refere la’ós SAPT nian mas SAPT arrenda tutan husi Estadu Timor-Leste hanesan na’in bá proprietáriu ne’e.

Relasiona ho problema ne’e, parte rua SAPT ho ENSUL MECI  lori malu ba Tribunál no ikus mai liu husi desizaun Tribunál Distritál Dili (TDD) primeira instánsia parte SAPT la satisfás hodi hatama rekursu bá Tribunál Rekursu (TR) kontra desizaun refere.

Iha loron 14 fulan-Dezembru tinan 2009, liu husi desizaun TR ho númeru prosesu sivíl 07/02 afavór bá parte SAPT, nune’e parte ENSUL MECI lakon no tenke selu osan arrenda bá SAPT.

Konstusaun DFBC iha rai ho uma Estadu ne’ebé hamosu disputa entre SAPT ho ENSUL MECI. Foto/Hatutan.com

“Desizaun TR afavór ba parte SAPT ne’ebé iha altura ne’ebá sai hanesan parte ne’ebé fó aluga hodi halo akordu arrendamentu no parte ENSUL MECI ne’ebé tuir akordu tenke selu osan arrenda ba SAPT, tanba ne’e desizaun TR ne’e kona-bá akordu ne’ebé sira selebra atu selu malu no la’ós kona-bá estatutu jurídika rai no uma Estadu, tamba TR la deside katak rai ho uma refere la’ós privadu ka la’ós pertense bá SAPT, maibé desizaun TR ne’e kona-bá akordu ne’ebé sira selebra tamba fó aluga fali rai ho uma Estadu,” Ministru Justisa Tiago Amaral Sarmento, informa hodi responde Hatutan.com liu husi WhatsApp, Tersa (10/05/2022).

Ministru Justisa Tiago Amaral Sarmento reafirma katak rai ho uma ne’ebé oras ne’e daudaun okupa hosi ENSUL MECI ne’e pertense bá Estadu Timor-Leste nian.

Lee Mós : Governu-ENSUL MECI Sei Formaliza Akordu Arrendamentu Rai ba Konstrusaun DFBC

Jornalista: Carmelita Isaac