Hatutan.com (12 Maiu 2022), Díli—Tribunál Distritál Díli (TDD) iha Tersa 10 fulan ne’e, liu hosi alegasaun Ministériu Públiku (MP) ne’ebe reprezenta hosi Prokuradór Jacinto Babo husu ba Tribunál atu aplika pena prizaun efetivu tinan 28 ba membru Polísia Nasionál Timor-Leste (PNTL), arguidu Mariano de Jesus ne’ebé utiliza pistola hodi hamate Mateus de Deus, Camilo da Conceição de Deus no hakanek lezadu Januário Pereira iha Lahane Orientál, iha 2021.

Pistola. Foto/Ilustrasaun Google.

Razaun MP husu pena ne’e, tanba konsidera faktus hotu ne’ebé konsta iha akuzasaun provadu hotu bazeia ba konviksaun arguido katak, loos duni momentu ne’ebá nia utiliza pistola hodi tiru mate Mateus de Deus, Camilo da Conceição de Deus no hakanek lezadu Januário Pereira iha Lahane Orientál.

Lee Mós: Omesídiu iha Lahane, Arguidu Konfesa Totalmente Tiru Uza Pistola

Hosi parte advogadu privadu Câncio Freitas husu ba Tribunál atu deside tuir konviksaun Tribunál hodi haree ba sirkunstánsia hotu ne’ebé iha, liu-liu ba hahalok arguidu durante prosesu julgamentu hodi kolabora ho justisa no konfesa totalmente faktus hotu.

Hafoin alegasaun, liu hosi juiz kolektivu Ana Paula Fonseca marka hikas audiénsia ba loron seluk hodi rona leitura sentensa.

Antes ne’e, iha audiénsia julgamentu ne’ebé hala’o ona iha loron 10 fulan ne’e ho númeru kriminál 0173/21.PCCC, arguidu konfesa totalmente katak nia utiliza duni pistola ne’ebé PNTL atribui ba nia hodi tiru no hamate vítima Mateus de Deus, Camilo da Conceição de Deus no hakanek lezadu Januário Pereira.

Tuir akuzasaun hosi MP katak, arguidu servisu nu’udár Polísia Nasionál Timor-Leste (PNTL), kolokadu iha Komandu Polísia Munisípiu Díli, nomeadamente iha Eskuadra Na’in-Feto, no relativa ho servisu ne’e PNTL atribui Pistola ida ho marka Glock 19, númeru serial FHX 093.

Maibé, iha loron 05 fulan Juñu tinan-2021 hale’u tuku 02:00 madrugada, arguidu ba iha vítima Mateus de Deus ho Camilo da Conceição de Deus nia uma ne’ebé lokaliza iha aldeia Ai-nitas Hun, suku Lahane Orientál, Postu Administrativu Vera Cruz, hodi bolu vítima Camilo de Deus nia naran ho lian makas, tanba ne’e vítima Camilo de Deus hamutuk Equilides de Jesus sai hosi uma laran hodi ba hasoru arguidu.

Bainhira vítima Camilo de Deus ho Equilides de Jesus sai hosi uma laran, arguidu hateten ba vítima Camilo de Deus katak “ita bo’ot ba sa’e karreta, maibé vítima Camilio de Deus responde “hau la ba!! tanba ó hatais sivil hela no kuandu ó la uza farda PNTL ha’u sei la ba sa’e karreta”

Maski nune’e, arguidu kontinua obriga vítima Camilo hodi ba sa’e karreta, no vítima  lakohi ho nune’e arguidu konsege dudu vítima  Camilo de Deus nia hirus matan provoka  vítima  mós halo reasaun hodi dudu hasoru arguido.

Ho situasaun ne’e halo arguidu nervozu no losu pistola iha kanotak hodi direta tiru ba vítima  Camilo de Deus nia kabun parte loos hodi halo vítima  monu kedan ba rai.

Rona kilat tarutu, vítima Mateus de Deus halai sai ba liur hodi hakilar arguidu dehan Mariano, maibé arguidu kontinua halo reazen hodi tiru kona iha vítima  Mateus de Deus nia hirus matan halo vítima  monu ba rai.

Situasaun ne’e, akontese mos ba lezadu Januario Pereira, kuandu rona kilat tarutu lezadu sai kedan hosi uma laran ba liur no momentu ne’eba lezadu hare vítima  Mateus de Deus monu hela iha rai ho ran nakonu no arguidu kaer hela Pistola iha liman halo lezadu tauk no tenta hodi halai tama fali ba uma laran, maibe arguidu tiru lezadu hosi kotuk no kilat musan kona iha lezadu nia ain parte karuk halo lezadu monu hela iha odamatan oin.

Bainhira vítima  Camilio de Deus, Mateus de Deus monu ba rai ho ran ne’ebé nakonu inklui lezadu Januário Pereira, arguidu halai sees kedan hosi fatin akontesimentu.

Hosi akontesimentu ne’e rezulta Camilio de Deus, Mateus de Deus mate fatin no lezadu Januário Pereira kanek todan.

Tuir relatóriu teste balístika ba Pistola Glock 19 ho númeru serial FHX 093, ne’ebé mak fó sai hosi Laboratóriu Polísia Sientifika (LPC) hatudu katak, pistola musan sira halo mate vítima  Mateus de Deus ho Camilo de Deus no halo kanek lezadu Januário Pereira ne’e mai hosi Pistola ho maraka Glock 19 ho númeru serial FHX O93 ne’ebé tiru sai hosi arguido.

Tanba ne’e, MP akuza arguidu ba pratika krime omesídiu agravadu dala rua no tentativa omesídiu ne’ebé previstu iha artigu 138 hosi kódigu penál TL.

Jornalista: Carmelita Isaac