Hatutan.com, (18 Maiu 2022), Díli—Polisia Nasionál Timor-Leste (PNTL), Komandu Munisipiu Likisá, konklui ona prosesu investigasaun bá kazu asalta komunidade nia uma iha área Natuka, aldeia Terleu, Suku Ulmera, Postu Administrativu Bazartete, Munisipiu Likisá.

Komandu Operasaun Espesiál (COE) hala’o treinamentu tiru iha Kaitehu Likisa, Sesta (22/10/2021). Foto/Média PNTL.

Kazu ne’e rasik, PNTL submete ona rezultadu investigasaun ba iha Ministériu Públiku (MP), hodi prosesa tuir lei.

Lee Mós: Omesídiu Lahane, Arguidu Ameasadu Prizaun Tinan 28

“Kazu hotu-hotu ita finaliza tiha ona, hein finalidade hosi prosesu investigasaun no depende ba kompeténsia ne’ebé oras-ida sei delega mai PNTL,” Portavós Komandu Jerál PNTL, Superintendente Xefe Polísia, Armando Monteiro hateten ba jornalista sira, liuhosi konferénsia imprénsa iha Kaurtél Jerál PNTL, Caicoli, kuarta (18/05/2022).

Kronolojia kona-bá kazu insidente ne’e, rezulta ema sivil utiliza arma ka  kilat-boot hodi asalta komunidade nia uma, iha Sesta 29 Maiu 2022, tuku 22:00 kalan, iha área Natuka, aldeia Terleu, Suku Ulmera, Postu Administrativu Bazartete Munisipiu Likisá.

Hafoin akontesimentu, ekipa PNTL tún kedan ba iha lokál krime nian hodi foti medida sira polisiál, liu-liu kolleta ona informasaun hosi komunidade ho autoridade lokál no oras-ne’e, destaka ona postu vizilánsia iha lokál krime.

Razaun PNTL instala postu vizilánsia ne’e tanba komunidade ho autoridade sira sente ladún satisfás, no inseguru.

Entaun, sé de’it mak husu autoridade seguransa ninian apoiu, PNTL prontu no preparadu atu oferese ekipa.

“PNTL konklui tiha ona, ita aprezenta ona no ita sei koordena ho instituisaun sira seluk oinsá atu bele prodús informasaun, kolleta informasaun, di’ak liután, nune’e sé iha delegasaun no orientasaun mai karik PNTL bele konklui. Dentru 72 oras, iha momentu ne’ebá, ita finaliza kedan liuhosi investigasaun komandu PNTL Munisipiu Likisá,” Komandante Armando informa tán.

Iha kazu insidente ne’e, públiku deskonfia katak autoridade polisiál sira mak hatais uza arma hodi ameasa ba komunidade.

Maibé, tuir regulamentu interna PNTL nian, iha lei númeru 43/2011 kona-bá regra no prosedura sira ba utilizasaun arma nian, katak bainhira uza tenke ho proporsionalidade uza nesesidade ho legalidade,  tenke iha resposabilidade ba armas iha tempu servisu.

Jornalista: Rogério Pereira Cárceres