Hatutan.com, (18 Maiu 2022), Díli—Polisia Nasionál Timor-Leste (PNTL), Komandu Munisipiu Lautém, liuhosi Servisu Investigasaun Kriminál (SIK), suspeita ona suspeitu ho inisiál DDS nu’udár autór prinisipál ba kazu omesídiu iha aldeia Com, Suku Parlamentu, Postu Administrativu Lautém, Munisipiu Lautém.

Portavós Komandu Jerál PNTL, Superintendente Xefe Polisia, Armando Monteiro haktuir kronolojia katak, iha Sesta 13 Maiu 2022, mosu kazu insidente ida iha aldeia Com, Suku Parlamentu, Munisipiu Lautém.

Lee Mós: Omesídiu Lahane, Arguidu Ameasadu Prizaun Tinan 28

Advertisement

Kazu insidente ne’e rezulta vítima mane ida ho inisial JDC ho tinan 15 mate, tanba deskonfia tara-an rasik.

Hafoin akontesimentu, komunidade ne’ebé hela besik informa direta ba Komandu PNTL Munisipiu Lautém, hamutuk ho ekipa Servisu Investigasaun Kriminál to’o kedan iha fatin akontesimentu, hodi hala’o prosesu ezaminasaun no konstrusaun iha lokál do krime.

Hafoin ezaminasaun, rezultadu investigasaun hatudu katak, kazu suisídiu ka tara-an ida ne’e iha mudansa hosi tara-an ba fali kazu omesídiu agravadu, ne’ebé mak rezulta joven JDC hakotu-iis.

“Hafoin, atendimentu no ezaminasaun lokál do krime, komandu PNTL Lautém hola kedan medidas polisiál, halo kapturasaun ba vítima ninia aman rasik ho inisiál DDS, idade 50,” Superintendente Xefe Polísia, Armando Monteiro hateten ba jornalista sira liuhosi konferénsia imprénsa iha Kuartél Jerál PNTL, Caicoli, Kuarta (18/05/2022).

Motivu hosi akontesimentu ne’e, suspeitu DDS hamutuk ho nia kolega sira seluk iha Suku Parlamentu, halo hela preparasaun liuhosi atividade limpeza jerál hodi komemora loron nasionál Restaurasaun Independénsia RDTL ba dala-XX, iha 20 Maiu 2022. 

Advertisement

Iha atividade limpeza ne’e, suspeitu DDS obriga vitima JDC hodi partisipa no hala’o mós limpeza jerál, maibé tanba vitima nia idade sei naton no rejeita hosi ida-ne’e, maka suspeitu halo agresaun hasoru vitima to’o iis-kotu.

Bainhira vitima nia iis-kotu, suspeitu DDS liuhosi maneira tara tali ba vítima ninia kokorok hodi nune’e relata ba autoridade katak, vítima rasik mak hakarak hakotu nia-vida, liuhosi tara-an.

“Maibé, ita nia investigasaun ninia estratejia no maneira hodi bele deskobre kazu ida-ne’e,” Komandante Armando haktuir.

Ho kazu omesídiu ne’e, Tersa 17 Maiu 2022 Komandu PNTL Munisipiu Lautém, transporta kedan suspeitu DDS lori mai iha Tribunál Distritál Baucau (TDB), hodi submete ba prosesu primeiru interrogatóriu.

Rezultadu hosi prosesu primeiru interogatóriu ne’e, desizaun hosi TDB katak, suspeitu tenke kumpri ninia dever iha prizaun preventive iha Becora Dili, tuir lei haruka.

Advertisement

Jornalista: Rogério Pereira Cárceres