Hatutan.com, (30 Maiu 2022), Díli—Atuál Diretór Ezekutivu ba Asosiasaun Halibur Defisiénsia Matan Timor-Leste (AHDMTL), Gaspár Afonso, iha Kuarta 01 juñu 2022, sei ativaninia servisu iha Palásiu Prezidente Bairru-Pité nu’udár Asesór Prezidente Repúblika (PR), José Manuel Ramos-Horta, hodi fó ninia asesória iha asuntu sira sosiál nian.

Diretór Ezekutivu ba Asosiasaun Halibur Defisiénsia Matan Timor-Leste (AHDMTL), Gaspár Afonso, ho Prezidente Repúblika (PR), José Manuel Ramos-Horta. Foto/Média PR.

“Mai hasoru-malu ho Prezidente Repúblika, primeiru atu lori ha’u nia membru sira mai komprimenta no hato’o parabéns ba sua-exelénsia. Segundu, parese ita boot sira média hatene ona, tanba ha’u sei mai ativu iha ne’e iha 1 juñu hanesan asesór prinsipál ba Prezidente Repúblika no ida-ne’e foin primeira vez mandatu doutór nian ba eventu hirak-ne’e. Katak, hanesan iha artigu 21, foin vale ne’e mak ida-ne’e,” Gaspár Afonso hateten ba jornalista sira, hafoin komprimenta PR Ramos-Horta, iha Palásiu Prezidente Bairru-Pité, Díli, Segunda (30/05/2022).

Gaspár Afonso haree katak, dutante tinan 20 ukun-aan, sura hosi 2002 mai to’o ohin loron, órgaun soberanu primeiru ne’ebé envolve direta ema ho defisiénsia matan atu fó kontribuisaun hodi dezenvolve rai ida-ne’e.

Alende ne’e, inisiativa inkluziva PR Ramos-Horta nian ne’e reflete duni ba iha Konstituisaun RDTL, artigu 16, alinea 2, hateten kona-bá laiha diskriminisaun ba rasa, kór, étniku, fíziku, mentál. La’os ba ko’alia karidade de’it, apoia karidade de’it, maibé la envole iha servisu públiku sira Estadu nian.

“Tanba ema ho defisiénsia ne’e ema iha kapasidade, ema iha abilidade, so ke, laiha oportunidade ne’e mak ami labele halo buat ida. Entaun, ba oin, média sira hasoru ha’u karik, la’ós diretór ona ba AHDMTL, maibé sei mai hamutuk ho sua-exelénsia durante tinan-lima, sai asesór prinsipál ba asuntus sosiais,” Gaspár Afonso hateten.

Gaspar Afonso sente orgullu tanba Prezidente Repúblika ema ida ne’ebé mak koñesidu iha mundu, iha nia diskursu sira sempre temi dehan sei lori ema ho defisiénsia matan ida ne’ebé mak koñesidu iha Timor-Leste.

“Afinál, ha’u halo buat sira ne’e, doutór mós akompaña hela, durante ha’u nia luta ba ema ho defisiénsia. Ne’ebé orgullu, agradese maske eskola seidauk hotu mais Prezidente bolu ona mai sai hanesan asesór. Ne’e la’ós tanba ha’u nia matenek, ne’e tanba ema ho defisiénsia sira 38.118, sira nia lian mak ha’u mai ne’e,” Gaspár afirma.

Maski tinan-lima sai asesór la halo buat ruma, maibé bainhira iha buat ruma iha AHDMTL ninian, hosi palásiu bele intervein direta ba asuntu ema ho defisiénsia, nomós ba vulnerabilidade sira seluk, tanba asuntu ema ho defisiénsia ne’e buat ida komun inklui asuntu LGTBI no komunidade sira seluk.

“Ha’u agradese ba Maromak tanba bele fó oportunidade ba ha’u atu servisu iha primeiru órgaun soberania iha ita-nia rain. Ne’e orgullu boot ba ha’u no ida-ne’e pasu primeiru ha’u atu hakat iha palku politika hodi kontribui dezenvolve rai ida-ne’e. Rai ida-ne’e, presiza ema hotu-hotu nia kontribuisaun, tantu ema defisiénsia no ema la ho defisiénsia,” nia agradese.

Hatán kona-bá oinsá ho futuru AHDMTL nian, bainhira nia asume ona kna’ar hanesan Asesór iha Palásiu Prezidente, Gaspár dehan maske nia sai ona hosi AHDMTL maibé Gaspar foun sei tuir mai.

“Ha’u mai ona iha palásiu, mais Gaspár nia espíritu, fuan, klamar hela nafatin iha AHDMTL atu motiva no fó korazen nafatin ha’u nia ema sira iha ne’ebá atu nafatin Gaspar iha krítiku no nafatin iha AHDMTL, nomós iha Palásiu Prezidente,” nia dehan.

Durante sorumutu, Prezidente Repúblika Ramos-Horta mós hato’o kona-bá ninia komitmentu sira atu halo buat ruma ba AHDMTL.

Ramos-Horta mós orienta ona ekipa ida lidera hosi Alexandrino Xavier hodi ba observa kondisaun iha AHDMTL nia fatin, tuir kompromísiu sira ne’ebé mak antes hato’o ona iha kampaña eleitorál.

Hahú 01 juñu, Gaspár hahú ativu iha Palásiu PR hanesan asesór hamutuk ho feto defisiénsia matan na’in ida inklui personál asisten na’in-rua mai hosi AHDMTL.

Oras-ne’e membru Ema ho Defisiénsia Matan Timor Leste ne’ebé mak halibur an iha AHDMTL, hamutuk 245. Maibé,  sira ne’ebé ativu hamutuk 90, kompostu hosi mane iha 45 no feto 45.

Enkuantu, destinu AHDMTL nian hahú hosi loron 01 fulan-juñu 2022 ba oin, sei lidera hosi Gabriel Fonciano de Sousa ne’ebé mak sei asume nu’udár diretór  interinu tranzitóriu durante tinan ida, sura hosi 01 de jullu 2022 to’o 01 jullu 2023.

Jornalista: Rogério Pereira Cárceres