Hatutan.com (02 Juñu 2022), Díli—Asosiasaun Jornalista Timor Leste (AJTL) sei halo asaun pasífika hasoru Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, bainhira la retira ka dada hikas keisa “Denuncia Caluniosa” kontra Xefe Redasaun Hatutan.com, Francisco Belo Simões da Costa.

Estrutura AJTL hala’o Konferensia Imprensa husu MAPKOMS dada hikas keixa Dununcia Caluniosa kontra Xefe Redasaun Hatutan.com Francisco Belo Simões da Costa, Fatuhada, Kinta (02/06/2022).

AJTL konsidera aktu MAPKOMS hanesan impedimentu no ameasa ida ba servisu jornalista nian liu-liu halo kontrolu sosiál ba osan Estadu ne’ebé instituisaun Estadu idak-idak jere iha konstestu projetu instalasaun Set-Top Box RTTL.EP.

Lee Mós: MAPKOMS Halo Keixa “Denúncia caluniosa” Hasoru Xefe Redasaun Hatutan.com

Tanba ne’e, AJTL husu ba MAPKOMS atu dada hikas keixa ne’e, nune’e bele rezolve liu hosi prosesu mediasaun iha Conselho de Imprensa (CI).

“Bainhira la dada maka AJTL sei hamutuk ho asosiasaun sira seluk, sei halo asaun pasífika hasoru MAPKOMS tanba la komprende jornalista no média nia papél hodi halo kontrolu sosiál liga ho boa Governasaun iha kontestu demokrasia,” Prezidente AJTL, Zevonia Vieira hateten liu hosi konferénsia imprensa iha sede AJTL Fatuhada, Kinta (02/06/2022).

AJTL konsidera keixa ne’e, hanesan MAPKOMS laiha kapasidade atu destinje entre asuntu privasidade no interese ema barak nian.

Tuir AJTL halo análiza kle’an katak, notísia investigativu hosi Média online Hatutan.com nu’udár  produtu jornalistiku hosi Jornalista ne’ebé bazeia ba faktu no realidade.

“Ministru ne’ebé assume hela kargu públiku, labele uza podér públiku hodi halo Denuncia Caluniosa, tanba dadus balun ne’ebé média online Hatutan.com fó-sai ajuda ona servisu investigasaun CAC no Polisia investigativu ne’ebé hola parte hosi kontribuisaun Hatutan.com,” Prezidente AJTL ne’e husu ho li’an makás.

Nune’e AJTL nafatin defende Liberdade Imprensa tanba MAPKOMS rasik servisu hodi tau matan ba mius komunikasaun sosiál sira ne’ebé eziste iha nasaun demoktratiku ne’e, maibé la rasik hatene no la komprende ninia papél ne’ebé tuir loloos tenke promove Liberdade imprensa.

Prezidente AJTL, Zevonia Vieira.

AJTL afirma nia pozisaun katak, sei kontinua akompaña kazu ne’e no husu ba Média Hatutan.com no jornalista sira hotu iha Timor Leste atu kontinua hala’o knaar jornalizmu ho profisionál hodi oferese nafatin informasaun ne’ebé loos no kredível ba povu bazeia ba kódigu étika jornalista.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza DILI ETERNAL INNOVATION INFORMATION, Lda nu’udár sósiu hosi Melánia da Silva Fernandes Capela nu’udár Sekretária iha Gabinete Prezidente FFTL.

Iha Segunda 23 Maiu 2022, Jornalista nu’udár mós Xefe Redasaun Hatutan.com, Francisco Belo Simões da Costa, presta ona deklarasaun iha Ministériu Públiku (MP) ka Prokuradoria Distritál Díli, kona-bá keixa balun ne’ebé hatama hosi Francisco Martins da Costa Pereira Jerónimo, atuál Ministru Asuntu Parlamentár no Komunikasaun Sosiál (MAPKOMS).

Iha Kinta (26/05/2022) Primeiru Ministru (PM), Taur Matan Ruak, lamenta tebes no la konkorda ho membru VIII Governu Konstitusionál, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ne’ebé halo keixa “Denúncia Caluniosa” ba Ministériu Públiku (MP) hasoru jornalista no Xefe Redasaun Hatutan.com Francisco Belo Simões da Costa.

Antes ne’e mós Assosiasaun Jornalista, Timor-Leste Press Union (TLPU) husu Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo atu rejigna-an hosi kargu nu’udár Ministru, tanba laiha sensibilidade no responsabilidade morál ba Liberdade Imprensa iha Timor-Leste.

Organizasaun sosiedade sivíl sira liu hosi Asian Justice And Rights (AJAR) ho Lalenok ba Ema Hotu (LABEH) antes ne’e konsidera Ministru Asuntu Parlamentár no Komunikasaun Sosial (MAPKOMS), Francisco Martins da Costa Pereira Jerónimo la hatudu ninia kualidade lideransa ne’ebé di’ak, no komete abuzu podér tanba halo keixa “Denuncia Caluniosa” hasoru jornalista no média online Hatutan.com ba Ministériu Públiku (MP) ka Prokuradoria Jerál Repúblika.

Antes ne’e iha 30 Maiu 2022, Ministru Assuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo konsidera “Denúncia Caluniosa”, la ameasa Liberdade imprensa iha Timor-Leste (TL).

Tanba ne’e Ministru ne’e mantein keixa hasoru jornalista, editór no Xefe Redasaun Hatutan.com bazeia ba kódigu penál 285 no husu atu husik orgaun idaidak hala’o ninia servisu.

Lee Mós:IFJ Husu Retira Keixa “Denuncia Caluniosa”, MAPKOMS Dehan Husik Órgaun Ida-idak Hala’o Nia Servisu

IFJ Ezije MAPKOMS Dada-Hikas Keixa Hasoru Jornalista Francisco Belo Simões

“Denúncia Caluniosa”, TLPU Husu MAPKOMS Rejigna-an

Jornalista: Carmelita Isaac