Hatutan.com (02 Juñu 2022), Díli—Estadus Unidus liu hosi Ajénsia Estadus Unidus ba Dezenvolvimentu Internasional (USAID) no Ministériu Finansas Timor-Leste ohin anunsia atividade foun ba tinan tolu ho millaun $10,2.

Atividade ne’e hodi ajuda Governu Timor-Leste institusionaliza sistema komérsiu ne’ebé governa ho di’ak no modernu ne’ebé profissionál, transparante, responsável, efisiente, efikáz, no responde ba Timor oan, no kompatível ho padraun internasionál sira.

 Lee Mós: EUA Anunsia Doasaun $500.000 Bá UNICEF Hodi Habelar Asaun Konjunta Hasoru COVID-19

Advertisement

Atividade ida-ne’e sei impulsiona komérsiu no kresimentu ekonomia, hasa’e governu nia reseita, hasa’e integrasaun rejionál no internasionál, no mós haforsa boa-governasaun.

“Estadus Unidus kompromitidu hodi kontinua apoiu Timor-Leste iha implementasaun sistema komérsiu ne’ebé governa ho di’ak no modernu,” Hatutan.com sita deklarasaun Diretora Missaun USAID Zema Semunegus iha komunikadu.

USAID valoriza koperasaun no kolaborasaun ne’ebé di’ak tebes ho Ministeriu Finansas no Autoridade Aduaneria, inklui liu hosi USAID nia Projetu Reforma Aduaneria ne’ebé foin remata dadaun, ne’ebé rezulta poupansa ho estimadamente millaun $38 ba empreza Timor nian liu hosi aumenta iha efisiénsia.

“Ami espera atu kontinua servisu ho Timor-Leste ne’ebé agora esforsu hela atu halo reforma domestika sira ne’ebé nesesaria  hodi aliña totalmente ninia rejime komersial ho regra Organizasaun Mundial ba Komérsiu no liberaliza ninia komérsiu,” nia espera.

Tuir pedidu Governu Timor-Leste nian, USAID sei servisu hamutuk ho Ministeriu Finansas, Autoriade Aduaneria, no ajénsia governu sira seluk, no mós ho setór privadu, hodi hadiak governasaun komérsiu, fasilitasaun komérsiu, no prosesu-sira alfandega nian.

Advertisement

Governu Estadus Unidus fornese millaun $10,2 liu hosi USAID/Timor-Leste nia Atividade Governasaun Komérsiu hodi apoiu Autoridade Aduaneira Timor-Leste nian no ajénsia governu sira seluk ne’ebé mak liga ho komérsiu.

Nune’e mós Ministru Finansas, Rui Augusto Gomes konsidera lansamentu USAID nia Atividade Governasaun Komérsiu foun ne’e marka pasu importante ida tán ba Autoridade Aduaneira TL.

“Apoiu millaun $10,2 ida-ne’e hanesan apoiu signifikante ida no esensiál hodi permiti ita-nia Autoridade Aduaneira iha ninia jornada atu sai organizasaun ida ne’ebé independente, konfiável no efisiente, tau kliente nu’udár sentru iha ninia prestasaun servisu esensiál. Ami agradese Estadu Unidus Amérika no Povu Amerikanu ba sira-nia apoiu ne’ebé firme. Ami prontu atu haklean liután Ita-nia parseria hodi alkanse Autoridade Aduaneria nia meta ba longu-prazu – ne’ebé mak atu “halo komérsiu lailais liu, simples liu no justu liu,” nia agradese.

Apoiu ida ne’e sei hadiak prosesu importasaun no exportasaun hodi funsiona tuir mellor pratika global no padraun sira ne’ebé iha Organizasaun Alfandega Mundial (WCO) ninia Estrutura Padraun hodi Proteje no Fasilita Komérsiu Global, Revisaun Konvensaun Kyoto WCO nian, Revisaun Deklarasaun Arusha WCO nian, no Akordu Fasilitasaun Organizasaun Mundial Komérsiu nian, no Rekizitu ba adesaun iha Asosiasaun Nasaun Sudeste Aziátiku nian.

Programa ida ne’e sei promove utilizasaun rekursu ne’ebé efisienti no efetivu liu tan no estabelese no jere estrutura adekuada ne’ebé sei fo komersiante no mós setór privadu sira lian hodi garante governu ida ne’ebé transparante no responsivu ba públiku.

Advertisement

International Business Initiatives, empreza kiik ho feto mak nu’udar na’in ho baze iha Estadus Unidus mak sei implementa atividade ne’e.

Jornalista: Carmelita Isaac