Hatutan.com, (07 Juñu 2022), Díli- Iha tinan sira liubá, hahú husi 2000 mai to’o 2003, sidade Dili infeta ho karreta importasaun sira husi nasaun oioin, liuliu Singapura ho folin ne’ebé baratu.  Tempu ne’ebá karreta sira hanesan sedang bele fa’an de’it ho folin entre $1.000 to’o $2.000, maibé timoroan barak lahatene katak karreta sira-ne’e uzadu no balun kondisaun at tebes ka “sukata”.

Lee Mós : “Pulaunya Besi Rongsokan”, Bisnis Mobil Bekas Menggeliat

Karreta “sukata” ne’ebé importa husi Austrália estasiona hela iha arredores Portu Díli. Foto/Hatutan.com

Karreta sira ne’e hateke husi dook nabilan, maibé bainhira timoroan sira sosa tiha, foin uza fulan rua ka tolu de’it komesa “runguranga” ona. Balun la to’o tinan gripa tiha ona no balun bá soe de’it iha ofisina sira iha Dili  laran.

Haree ba realidade ne’e, Governu hasai lei ida hodi limita importasaun karreta “uzadu” sira mai Timor no tinan bá tinan Lei ka regulamentu ne’e renova bá beibeik tuir nesesidade no kondisaun. Nune’e, iha tinan 2011 Governu ofsializa dekretu lei númeru 30/2011 kona-bá importasaun transporte terrestre ne’ebé regula atu karreta sira ne’ebé importa mai Timor Leste la bele nia tinan produsaun tinan lima bá kraik.

Maske lei ne’e iha maibé kontinua la regula importadór sira atu importa karreta uzadu  ka “sukata” sira mai Timor. Ironia liután, iha tinan ikus-ikus ne’e, iha ona fenómena foun, kona-bá importadór sira, liuliu empreza sira sosa no fa’an karreta, inklui hirak ne’ebé fó aluga karreta (rental karreta) komesa hatama ona karreta uzadu no “sukata” husi Austrália.

Daudaun ne’e iha arredores Portu Díli nian bele haree fenómena “foun” kona-bá karreta ho kondisaun “sukata” alias soke rahun barak mak estasiona hela iha fatin “leet” sira Portu Díli nian.

Karreta ho modelu ka marka oioin ne’e,  bele dehan, hetan dezastre hotu iha Austrália no iha Austrália karreta sira ne’e tenke bá soe hotu ona iha fatin lixu tanba kondisaun la permite ona atu bele utiliza. Maibé, iha empreza timoroan balun bá sosa karreta ho kondisaun “sukata” tebes ne’e hodi importa fali mai Timor-Leste.

Informasaun ne’ebé Hatutan.com halibur husi fonte oioin  katak   karreta “sukata” sira-ne’e importa tiha mai Timor hodi hatama fali iha ofisina hadi’a tiha pois mak fa’an fali iha merkadu Timor.

Fonte sira ne’e informa katak karreta “sukata” sira-ne’e iha Austrália tenke tama ona bá lixu hodi bá soe tanba barak mak át kauza husi asidente tráfiku. Nune’e, tuir regulamentu Transporte no Rodoviariu Austrália, la permite ona atu halo operasaun.

Ironia. Iha Austrália karreta “sukata” sira-ne’e la bele ona halo operasaun, maibé sai fali oportunidade negósiu boot bá timoroan sira ne’ebé hala’o negósiu fa’an no sosa karreta hodi importa fali mai Timor-Leste.

Sira lori karreta “sukata” ne’e mai Timor no bá hadi’a fali iha ofisina sira iha Dili laran para ikus mai fa’an fali bá timoroan sira iha Timor ho folin ne’ebé la’ós baratu.     

Karreta “sukata” ne’ebé importa husi Austrália estasiona hela iha arredores Portu Díli. Foto/Hatutan.com

Diretór Nasional Operasaun Alfándega, Armindo dos Santos, hateten iha importadór balun mai hasoru nia kona-bá sira-nia atividade importa karreta “sukata” husi Austrália.

Dekretu lei númeru  30/2011 kona-bá importasaun karreta ka veíkulu ne’ebé fó Alfándega utiliza para ezekuta iha liña fronteira no entrada sira-ne’e la hateten katak karreta ne’ebé mak ho kondisaun aat labele lori mai Timor-Leste.

Iha Dekretu Lei ne’e hateten de’it katak karreta ne’ebé tinan produsaun liu ona tinan lima ka tinan lima ba kraik labele tama mai Timor-Leste.  Maibé la mensiona bandu karreta “sukata” ho tinan produsaun tinan lima mai leten tama territóriu Timor-Leste.  

“Parte sira liuliu hirak ne’ebé iha kompeténsia bá foti desizaun no halo Lei presiza haree halo didi’ak tamba Timor-Leste ne’e atu sai tiha fali hanesan fatin lixu ne’ebé maka karreta soke iha fatin seluk haruka hotu mai Timor-Leste,” Diretór Nasional Operasaun Alfándega, Armindo dos Santos, hateten hodi responde Hatutan.com iha nia servisu fatin, Tersa (07/06/2022).

Parte Alfándega ne’ebé servisu iha odamatan inklui ho Servisu Nasionál Informasaun (SNI) hamutuk ho Polisia Nasional Servisu Investigasaun Kriminál (PNSIK)  no ekipa  intelijénsia Jota Dois (J2) ne’ebé mak servisu hanesan ekipa operasaun tetu katak ida ne’e presiza haree halo didi’ak lai tamba Timor-Leste ne’e atu sai tiha fali hanesan fatin lixu ne’ebé maka karreta soke iha fatin selu, liuliu iha Austrália haruka hotu mai Timor-Leste.

“Ita presiza atu hadi’a lai lei no temporáriamente karreta sira ne’ebé haruka mai kuaze semana rua resin ona paradu hela iha Portu Díli no labele sai tamba sei hein desizaun husi Governu,” Armindo dos Santos hateten.

Alfándega submete ona paresér ba Ministériu Finansas atu halo revizaun ba lei númeru 30/2011 nune’e lori bá iha Konsellu Ministru hodi halo revizaun bá Lei ne’e no oras ne’e revizaun sei lao hela maibé temporáriamente karreta “sukata” sira ne’ebé maka hetan asidente iha Austrália  tama ona mai Timor-Leste.

Timor-Leste rasik iha Lei númeru  8/2006 artigu 6 no artigu 8 ko’alia kona-bá Protesaun Bá Direitu Konsumidór, nune’e parte hotu presiza tetu ho di’ak importasaun karreta “sukata” sira-ne’e atu la bele prejudika ka halo timoroan sira sai fali vítima bá importasaun karreta “sukata” husi Austrália ne’e.

Karreta “sukata” ne’ebé importa husi Austrália estasiona hela iha arredores Portu Díli. Foto/Hatutan.com

Too oras ne’e parte Alfándega seidauk iha lista ida klaru kona-bá empreza hira mak importa karreta “sukata” mai Timor-Leste maibé tuir informasaun katak iha empreza tolu ka haat mak hala’o atividade importasaun  ne’e.

Hatutan.com tenta halo konfirmasaun direita ho Diretór Alfándega Portu Díli, Alberto Seixas hodi husu klarifikasaun ba númeru karreta “sukata”  hirak mak oras ne’e estasiona hela iha arredores  Portu Díli no empreza hira mak importa karreta hirak ne’e,  maibé diretór alfándega portu Díli liu husi nia staff iha gabinete hateten diretór dehan seidauk bele fó sai dadus loloos kona-bá Kareta ne’ebé importa mai tamba balun to’o ona Portu Díli no balun iha dalan mai Timor-Leste.  Nune’e parte Alfándega  seidauk iha dadus loloos kona-bá númeru karreta “sukata” hira mak importa mai Timor-Leste.

Bá importasaun karreta “sukata” sira-ne’e aplika taxa porsentu lima (5%) husi kada karreta nia folin orijen.  

Bainhira karreta hirak ne’e la hetan autorizasaun husi Governu atu utiliza iha territóriu nasionál,  tuir kódigu Aduaneira fó dalan bá Alfándega atu haruka fila fali ba nasaun no karik sira lakhoi simu hikas karreta hirak ne’e governu foti pozisaun katak ne’e afavór ba Estadu ne’ebé Governu bele deside atu hadi’a ka halo destruisaun.

Jornalista: Vito Salvador