Hatutan.com, (08 Juñu 2022), Díli—Ministériu Saúde (MS) halo redusaun ba Orsamentu ne’ebé atu apoia Klínika Bairru-Pité husi montante $258.000 ba $68.000 ho razaun osan restu aloka ba Servisu Nasionál de Ambulánsia e Emerjénsia Médika (SNAEM) nu’udár instituisaun foun.

Vise Ministru Saúde, Bonifácio “Maucoli” dos Reis.

“Klinika ne’e hanesan klinika privada ne’ebé momentu ne’ebá Governu tau ona osan. Maibé, MS halo redusaun ho razaun tanba osan restu aloka mós ba instituisaun autónomu ida ne’ebé foin estabelese hanesan SNAEM ne’ebé presiza mós osan,” Vise Ministru Saúde, Bonifácio “Maucoli” dos Reis hateten ba jornalista sira, hafoin reuniaun Konsellu Ministru iha Palásiu Governu, Kuarta (08/06/2022).

Lee Mós: Governu Seidauk Transfere Osan, Klínika Bairru-Pité Taka Atendimentu Espesiál Haat

Tanba ne’e iha momentu ne’ebá halo kedan transferénsia iha Parlamentu Nasionál (PN), maibé karik osan ne’e to’o agora klínika Bairru-Pité seidauk simu, no Maucoli sei konfirma lai tanba tuir nia hatene katak osan ne’e aloka ona.

Antes ne’e Klínika privada Bairru-Pité taka ona atendimentu públiku iha área ha’at mak hanesan internamentu jerál, partus, servisu sosiál no saúde feto no mal nutrisaun ho razaun laiha finanseira tanba Ministériu Saúde (MS) seidauk halo transferénsia osan ho montante $258.000.

Alternativa seluk ne’ebé Klínika halo hodi kontinua fó atendimentu ba públiku maka liu hosi kontribuisaun komunidade no pasiente.

Tanba ne’e, husi fulan Marsu konsege hetan $2.000-resin no iha fulan Abríl $1.300 hodi responde ba funsionamentu klínika inklui osan tranporte ba funsionáriu no kombustível.

Jornalista: Carmelita Isaac