Hatutan.com, (04 Jullu 2022), Díli—Tuir dadus hosi Polísia Nasionál Timor-Leste (PNTL), Tránzitu Díli, durante fulan-juñu 2022 rejísta asidente tráfegu 105 ne’ebé  akontese iha kapitál.

Komandante Tránzitu Munisípiu Díli, Inspetór Polísia, Domingos Sarmento Gama.

“Kazu asidente tráfegu iha fulan-juñu nia laran hamutuk 105. Kazu sira-ne’e, iha asidente fatal lakon vida ida, kanek todan 20, kanek kaman 111,” Komandante Tránzitu Díli, Inspetór Polísia, Domingos Sarmento Gama hateten.

Lee Mós: Ema 56 Mate iha Asidente Tráfegu

Hosi númeru ne’e, kazu ida mak PNTL enkamiña ona nia prosesu ba iha ministériu públiku, hodi kahotu iha Tribunál Distritál Díli (TDD) no oras-ne’e sei iha prosesu laran.

Advertisement

Prosesu kazu ida tenke to’o iha Tribunál tanba parte rua ne’ebé involve iha asidente tráfegu ne’e, lakohi rezolve tuir dalan família, maibé iha totál kazu hamutuk 72 maka konsege rezolve tuir dalan familia.

Kazu asidente tráfegu sira ne’ebé mak balun konsege rezolve tuir dalan família no balun enkamiña nia prosesu ba MP ne’e, la’ós PNTL mak obriga, maibé depende ba desizaun hosi parte rua ne’ebé mak involve iha asidente ne’e.

“La signifika Polísia mak obriga sira halo mediasaun, la’e. Ne’e laiha baze legal. Maibé depende ba vítima sira ka suspeitu sira konkorda atu rezolve família,” nia esplika.

Ezemplu, ida seluk sente sala, prontu atu hadi’a ida seluk nia motór ka ida seluk nia karreta, konkorda, sira halo deklarasaun rasik, lori mai aprezenta no rezolve familia.

Biar kazu sira ne’e rezolve ona tuir dalan familia nian, maibé ninia prosesu legál kontinua iha nível justisa ne’ebé formál, katak tenke hakotu iha TDD.

Advertisement

Importante maka deklarasaun ka akordu ne’ebé mak sira halo, tenke kaer, perante tribunál bolu no sira sei ba aprezenta iha tribunal no tribunál de’it mak iha kompeténsia atu foti desizaun finál.

“Kazu sira ne’ebé mak oras ne’e sei pendente, prosesu hela mak falta 32, ba fulan juñu nian,” Komandante Domingos Sarmento, informa tán.

Alende ne’e, totál kazu infrasaun ne’ebé mak mosu durante iha fulan-juñu nia laran 133. Enkuantu, totál tikete ne’ebé pasa ba infratór sira hodi ba selu koimas, hamutuk 751.

Rezultadu selu koimas hosi 751 ne’e, konsege hatama reseitas ba Estadu, iha fulan-juñu nia laran hamutuk $30.281.

Iha semana ikus fulan-juñu 2022 (25 to’o 31), sira hatama osan ba kofre Estadu ho montante $6.927. Valór osan ida ne’e, liuhosi tikete hamutuk 180 ne’ebé PNTL Dili pasa ba infratór sira.

Advertisement

Infratór sira ne’ebé komete infrasaun, totál evidénsia Tránzitu preende ne’e hamutuk 172.

Ba infrasaun hirak ne’e, iha tipu de infrasaun ne’e hamutuk hotu 191, durante iha juñu nia laran.

Jornalista: Rogério Pereira Cárceres

Advertisement