Hatutan.com, (05 Jullu 2022), Díli—Prezidente Repúblika (PR) José Ramos-Horta husu ba Komisaun Funsaun Públika (KFP) atu servisu ho imparsialidade no neutralidade hodi hadook an hosi tentasaun liuliu monu iha partidarizasaun Funsaun Públika.

Prezidente KFP, Faustino Cardoso. Foto/Hatutan.com

Xefe Estadu mós enkoraza atu KFP servisu hamutuk ho entidade tomak inklui ekipa tékniku sira hosi Prezidénsia Repúblika hodi haree lisuk ba kestaun funsionalizmu Funsaun Públika.

Lee Mós: KM Aprova Dekretu Lei Foun Aprovizionamentu, Kontratu Públiku no Infrasaun

“Xefe Estadu mós hato’o katak KFP presiza iha reforma ida atu oinsá mak hamenus depedénsia ba iha mina-rai, tanba bainhira funsionalizmu Funsaun Públika ne’e boot ba bei-beik sei tau ba risku sustentabilidade finanseira Estadu,” Prezidente KFP, Faustino  Cardoso Gomes hateten iha Palásiu Prezidensiál, Bairru-Pité, Tersa (05/07/2022).

“Ita mai atualiza ba Xefe Estadu kona-bá jestaun rekrutamentu, promosaun, kargu diresaun, prosesu disiplinár ninian no oinsá liga ho irregularidade, formasaun, reforma no situasaun sira seluk ne’ebé durante ne’e Xefe Estadu rejista hela atu hetan esplikasaun hosi parte Komisaun Funsaun Públika,” Faustino Cardoso Gomes hateten.

KFP mós mai esplika kona-bá preokupasaun públiku nian ba prosedimentu sira ne’ebé aplika atu husu responsabilidade ba irregularidade sira ne’ebé iha inklui aplikasaun sansaun tuir grau infrasaun ne’ebé funsionáriu ida-idak komete.

Kada tinan KFP sempre hato’o relatóriu ba iha Parlamentu Nasionál, iha relatóriu ne’e Komisaun Funsaun Públika hatuur kona-bá kestaun prosesu disiplinár ne’e la’o to’o iha ne’ebé.

KFP rasik iha ninia Komisáriu ida atu haree espefikamente ba iha prosesu disiplinár ne’e, bainhira iha investigasaun deteta iha irregularidade disiplinár, klaru katak prosedimentu la’o asegura mós justisa iha prosesu sira ne’e, maibé molok hola desizaun KFP fó oportunidade ba ema ne’ebé hetan infrasaun atu bele hato’o ninia resposta halo esplikasaun razaun tanba saida ne’e atu asegura justisa iha prosesu disiplinár molok ba desizaun no aplika pena.

“Ita fó ona sansaun ba funsionáriu barak maibé ha’u la lembra númeru, tanba infrasaun ne’ebé aplika ne’e iha kategória neen hahú hosi abandonu servisu tanba la tama servisu liu hosi loron 21 ne’e automatikamente demisaun ona. Seluk maka mal-administrasaun, kona-bá irregularidade pena ne’e rasik, ida seluk mak kona-bá asediu seksuál, kestaun oinsá abuzu podér, maibé ida ne’ebé dominante ne’e mak irregularidade funsionál ida ne’e as tebe-tebes, tuir kedan abandonu servisu katak nia falta sem iha justifikasaun,” nia esplika.

Iha sorumutu ne’e parte KFP mós atualiza ba Xefe Estadu katak buat ida reforma ne’e seidauk iha lei ne’ebé obriga ema sira ne’ebé tama ona idade 60 ba leten bele reforma tanba to’o ohin loron ema ne’ebé idade hosi 60 ba leten ne’e iha rihun 3-resin ne’ebé karik lei obrigatória reforma ne’e iha ona no aplika signifika loloos ne’e sira tama ona reforma, maibé infelizmente ida ne’e seidauk.

KFP sempre servisu hamutuk ho parte governu ne’ebé agora avansa hela ho proposta, pedidu autorizasaun legál ba iha PN atu oinsá regula kona-bá pensaun ninian inklui definisaun kona-bá idade limite servisu efetivu 60-70 presiza atu define maibé ohin loron seidauk iha.

To’o ohin loron, númeru pessoais Funsaun Publiku atinje 35.000-resin tiha ona kompostu hosi funsionáriu permanente hamutuk 27.000-resin aumenta tan ho ajente administrasaun públika ne’ebé númeru sa’e ba bei-beik.

“Uainhira aumenta tan ho funsionáriu kazuais ho tan sira seluk besik 40.000 ona, se konta tan ho sira seluk hanesan PNTL-F-FDTL ne’e 50.000-resin. Ne’e bele imajina Funsaun Públika ne’e boot ba bei-beik,” nia hateten.

Jornalista: Vito Salvadór