Hatutan.com, (12 Jullu 2022), Díli– Emprezáriu timoroan balun submete ona proposta bá Governu atu halo investimentu iha área aviasaun sivíl atu nune’e Timor-Leste mós bele iha aviaun rasik ne’ebé semo ho bandeira Timor-Leste nian rasik.

Ministru Transporte no Komunikasaun (MTK), José Agostinho da Silva. Foto/Hatutan.com

Dezde Timor-Leste restaura nia independénsia iha 20 fulan-Maiu 2002 to’o mai ohin loron, aviaun komersiál sira ne’ebé halo operasaun husi nasaun sira estranjeiru nian mai Timor-Leste mesak aviaun sira estranjeiru nian ne’ebé timoroan balun mak aluga ka charter.

Aviaun balun, timoroan parseria ho ema estranjeiru sira mak charter hodi fasilita vou komersiál husi rai-li’ur mai rai laran. Mézmu Timor rasik mós sai ona membru ICAO (International Civil Aviation Organization), maibé Timor seidauk bele semo ka halo vou ho nia aviaun rasik no ho nia bandeira rasik.  

Ministru Transporte no Komunikasaun (MTK), José Agostinho da Silva, hateten Governu iha nia kompromisu atu Timor iha duni nia aviaun rasik no prosesu sira ne’e sei iha esforsu nia laran atu TL bele iha aviaun rasik.

José Agostinho dehan, iha ninia mandatu dahuluk ne’e, nia konvoka ona sorumutuk ida ho timoroan sira ne’ebé maka durante ne’e servisu iha área transporte aéreu hodi ko’alia bá malu oinsá esforsu atu to’o tempu ida TL bele iha rasik ninia national flight carrier ida ne’ebé mak uza símbolu nasionál timor nian rasik.

“Iha pedidu sira, mas ha’u seidauk bele ko’alia, bainhira prosesu ne’e sei la’o hela. Bainhira ha’u pronúnsia buat ruma, situasaun ne’e serteza lai, depois ita hotu halo akompañamentu, kuandu serteza ona, entaun ita tenke orgullu,” Ministru Transporte no Komunikasaun (MTK), José Agostinho da Silva, hatete bá Hatutan.com iha kna’ar fatin, foin lalais ne’e.

Hatán kona-bá kompañia ka timoroan sé no na’in-hira mak submete ona sira-nia proposta bá Governu, Ministru José Agostinho, husu atu konfirma direta asuntu ne’e ho Autridade Aviasaun Sivíl Timor-Leste (AACTL, sigla portugés)  tanba téknikamente AACTL iha liu koñesimentu.

Nia afirma, timoroan sira iha inisiativa no hakarak investe iha setór aéreu nian, tanba sá mak labele no Governu nia odamatan nakloke bá sidadaun sé de’it, maibé importante mak labele ko’alia de’it, tenke prepara dokumentu sira, depois tékniku sira sei haree no avalia oinsá mak nia prosesu bá oin.

Bainhira timoroan sira ne’e prienxe tiha ona rekizitu sira administrativu nian, tékniku, no rekizitu legál sira, maka timoroan sira iha direitu tomak. Entaun, Governu ninia pozisaun mak atu fasilita ema hotu, la’ós de’it timoroan sira, maibé mós estranjeira.

“Ita iha regra oinsá mak sira bele kumpre rekizitu legál ne’ebé mak vigora. Ne’ebé, ba parte hothotu, timoroan hothotu ne’ebé maka iha interese atu investe iha setór aéreu nian, Governu iha vontade tiha ona, oinsá maka bele promove, oinsá maka bele fasilita ho regra,” José Agostinho tenik.

Esforsu sira governu nian atu TL bele iha ninia aviaun rasik, oras ne’e la’o hela, no timoroan hotu nia espetativa, no esperansa katak, to’o iha tempu ida tenke iha rasik aviaun.

Haree ba istória mundiál, nasaun barak iha mundu ne’ebé mak ohin sira avansadu tebes iha setór aéreu ne’e, sira nia istória ne’e hahú hosi buat ne’ebé ki’ik-oan, la’ós perfeitu kedan. Maibé, enfrenta situasaun ida ne’ebé maka difisil tebes.

Ministru José Agostinho da Silva, konta katak, iha ninia vizita ida bá Brunei Darussalam, nia lembra aprezentasaun iha slide ida, hosi ministériu transporte terrestre ninian, sira nia istória iha setór transporte terrestre ne’e, hahú dezenvolve ho bisikleta.

 “La’ós autoriza ka la autoriza, ida ne’e vontade ema nian, maibé, regra ne’e iha, oinsá mak ita fó welcome bá sira,” José Agostinho da Silva hateten.

Jornalista: Rogério Pereira Cárceres