Hatutan.com, (26 Jullu 2022), Díli—Polísia Nasionál Timor-Leste (PNTL), liu hois Komandu Munisípiu Díli, unidade Polísia Tránzitu, hahú halo operasaun ba karreta aat sira ne’ebé frozen ona no estasiona kleur iha Estrada públiku.

Karreta aat sira ne’ebé aat ne’ebé para kleur iha dalan públiku, Polísia Tránzitu lori ba para iha edifísiu Polísia Tránzitu.

Iha Tersa 26 jullu, Unidade Tránzitu konsege rekolla ka ‘raut’ ona karreta frozen rua (2), ne’ebé mak estasiona kleur ona  iha estrada públiku, ida iha área Bidau Lecidere no ida seluk iha área Villa-Verde ne’ebé difkulta movimentu transporte públiku.

Komandante Polísia Tránzitu Munisípiu Dili, Inspetór Xefe Polísia, Domingos Sarmento Gama apela ba komunidade katak, transporte hanesan karreta no motór mak aat ona, labele para iha estrada públiku, maibé husu atu lori ba para de’it iha arredór uma nian, ka iha ofisina sira nune’e labele difikulta ema seluk ninia movimentu.

“Ba loron ohin ita remata iha tuku 12:00. Ita konsege foti karreta rua de’it. Oras ida 14:00 oras ba leten, ita sei kontinua tán. Depende ba ita nia tempu de’it, bele foti haat ka lima,” Inspetór Xefe Polísia, Domingos Sarmento Gama hateten durante operasaun iha área Akait, Suku Gricenford, Postu Administrativu Na’in-Feto, Munisipiu Díli, Tersa (26/07/2022).

Advertisement

Komandante Polísia Tránzitu Munisípiu Dili, Inspetór Xefe Polísia, Domingos Sarmento Gama.

Karreta hirak ne’e Polísia Tránzitu lori ba para iha área edifísiu Komandu Polísia Tránzitu no fó tempu ba karreta na’in durante loron 90, bainhira la ba selu multa $120, sei lori ba entrega iha parte Diresaun Jeral Jestaun Patrimóniu Estadu (DJJPE) atu bele halo jestaun tuir Lei.

Tuir Lei Kódigu Estrada artigu 50 hateten katak, sidadaun sira labele utiliza fali fatin públiku ka estrada protokolu sira, hodi estasiona ka para sira ninia karreta ne’ebé aat ona ka nia kondisaun labele ona halo operasaun.

Molok ne’e, iha 2020 PNTL Munisipiu Dili, liuhosi atividade operasaun ne’ebé hanesan, konsege rekolla ona karreta ho unidade hamutuk hitu (7) iha área Santa Cruz ho Audian.

Iha 20 Maiu 2022 foin lalais, rekolla tán karreta unidade haat (4) iha área Comoro, besik portaun estrada Aeroportu Internasionál Nicolau Lobato, Díli.

Jornalista: Rogério Pereira Cárceres

Advertisement