Hatutan.com, (28 Jullu 2022), Dīli—Emprezáriu nasionál Timoroan nu’udár na’in bá empreza Esperansa Timoroan (ETO), Nilton Gusmão, husu bá povu Timor-Leste hotu iha territóriu Timor laran atu la bele pániku ho boatu ne’ebé espalla dehan, Timor-Leste sei enfrenta krize kombustivel.

Transporte sira forma naruk iha Sentru KOmbustivel ETO, BEbora, Díli, Kinta (28/07/2022). Foto/Hatutan.com

Bá Hatutan.com, Kinta (28/07/2022), Nilton Gusmão, garante katak Timor-Leste sei la krize kombustivel tanba daudaun ne’e ETO rasik iha estoke kombustivel iha Timor purvolta tonelada 600,000 no ró ETO nian iha daudaun dalan mai Timor hodi transporta mina ho kuantidade barak.

Informasaun seluk ne’ebé Hatutan.com asesu husi fonte sira iha empreza Pertamina Internasionál Timor S.A katak sira-nia stoke kombustivel mós transporta daudaun ho ró iha dalan mai Timor-Leste.

“Timoroan sira hotu iha Timor atu lalika pániku liu tanba stoke kombustivel iha timor sufisiente no Timor sei la krize kombustivel,” Nilton Gusmão hateten.

Empreza ETO nu’udár empreza timoroan ne’ebé hala’o atividade fornesimentu kombustivel iha Timor-Leste, daudaun ne’e fornese hela kombustivel bá  estasaun kombustivel REALISTIK iha Balide ho Mekar Fuel iha Luru-Mata, Comoro, atu hamenus tiha públiku nia pániku bá boatu ne’ebé sirkula katak Timor Leste enfrenta daudaun krize kombustivel.

Motorista sira paníku ho buatu TL sei krize kombusivel. Foto/Hatutan.com

Tuir observasaun Hatutan.com nian dezde horikalan to’o tuku 9:49 dadeer ne’e, motorista transporte públiku no privadu sira kontinua forma naruk iha Estasaun Kombustivel ETO nian iha Bebora, Díli, inklui estasaun kombustivel iha fatin seluk tanba pániku ho boatu ne’ebé sirkula iha públiku katak Timor-Leste sei enfrenta krize kombustivel.

Husi sorin seluk, estasaun Kombustivel REALISTIK ho Mekar Fuer to’o ohin dadeer, kombustivel la iha. Maibé, ETO komesa transporta ona kombustivel bá estasaun kombustivel rua ne’e atu garante la iha krize kombustivel iha Timor-Leste. 

Jornalista : Rogério Cárceres