Hatutan.com, (28 Jullu 2022),  Díli–Prezidente Repúblika (PR), José Ramos-Horta ho Primeiru-Ministru (PM), Taur Matan Ruak,  hahú halo diskusaun no  konfirma fali akordu sira ne’ebé Timor-Leste halo Indonézia durante vizita Xefe Estadu nian iha Indonézia, foin lalais ne’e.

Lee Mós : Ramos-Horta Agradese ba Indonézia Ne’ebé Apoia Dezenvolvimentu TL

Prezidente Repúblika (PR), José Ramos-Horta ho Primeiru-Ministru (PM), Taur Matan Ruak. Foto/Hatutan.com

Iha enkontru semanál  PM Taur Matan Ruak  ho Prezidente Repúblika, José Ramos-Horta, iha Palásiu Prezidensiál, Díli, Kinta (28/07/2022), Prezidente Repúblika ko’alia mós kona-ba vizita Prezidente Repúblika nian bá Indonézia oinsá mak aban bainrua halo konfirma fila fali   asuntu sira ne’ebé trata iha Indonézia no haree nia kontinuasaun.

Taur Matan Ruak hateten, Xefe Estadu mós informa katak gabinete sei prepara relatóriu viajen servisu bá Indonézia atu partilla ho Governu oinsá halo follow-up bá asuntu sira, akordu sira ne’ebé trata no asina iha Indonézia atu haree pasu bá oin nian.

“Ita bainhira asina ona ne’e pasu administrativu no tékniku tenke la’o antes ita implementa, ita labele dehan asina ohin halo kedas tanba ita iha akordu barak hanesan uluk ha’u sei Prezidente Repúblika ita iha akordu besik atus rua resin no husi ne’e 20 de’it mak implementa,” Taur Matan Ruak hateten ba jornalista sira.

Xefe Governu husu  bá Ministériu Negósiu Estranjeiru no Kooperasaun (MNEK), atu haree akordu hira, konvensaun hira, MoU hira mak Timor-Leste iha tanba iha akordu barak mais implementasaun ki’ik liu no kuaze 10% husi akordu ne’ebé iha.

Daudaun ne’e Governu atentu loos, uainhira asina akordu ida, tenke prepara planu oinsá atu implementa akordu ida ne’e, tanba ne’e parte Governu sei halo esforsu atu Timor-Leste la’ós asina de’it maibé tenke implementa tamba balun tenke haruka ba Parlamentu Nasionál atu ratifika molok implementa.

Iha enkontru ne’e xefe governu informa mós ba Xefe Estadu kona-ba akordu entre Timor-Leste ho MCC ne’ebé Konsellu Ministru aprova ona no haruka bá Parlamentu Nasionál atu ratifika no mós investimentu sira ne’ebé Governu halo tantu iha Díli no mós iha munisípiu balun kona-bá oinsá mak hadi’a kondisaun bee-moos bá povu.

Lee Mós : TL-RI Estabelese Kooperasaun iha Setór Haat

Jornalista: Vito Salvadór