Hatutan.com, (01 Agostu 2022), Díli-Membru FALINTIL-Forsa Defeza Timor Leste (F-FDTL) hamutuk na’in 27, Segunda (01/08/2022), hetan promosaun diviza hosi komandu F-FDTL, iha Kuartél Jenerál F-FDTL, Fatuhada, Díli.

Lee Mós : Rekrutamentu F-FDTL 2022, Laiha Rekomedasaun Espesiál

Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” tula diviza bá membru F-FDTL ne’ebé hetan promosaun diviza. Foto/Media F-FDTL

Membru sira ne’ebé mak hetan ona promosaun ne’e, hosi Postu Major bá Tenente Coronel na’in-ida (1), Postu Capitão ba Major na’in-rua (2), no Postu Segundu Sarjentu bá Primeiru Sarjentu na’in-24.

Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek”, hateten, promosaun diviza ne’e marka tán pasu istóriku ida iha dezenvolvimentu forsa armada nian. Dezenvolvimentu ida ne’e, hahú kedan iha loron 02 fulan-Fevereiru 20o2 to’o mai ohin loron.

“Ita-boot sira nia dedikasaun no dezempeñu. Mas la’ós ida ne’e de’it, ita-boot sira-nia espíritu sakrifísiu no vontade mak ita-boot sira konkista tan pasu ida ne’e mai oin,” Tenente Jenerál Domingos Raúl “Falur Rate Laek”, hateten iha nia diskursu.

Falur Rate Laek dehan, iha instituisaun F-FDTL nia laran, ema hotu-hotu, hahú superior, ofisial no soldadu sira, iha valór ne’ebé hanesan de’it maibé, funsaun no responsabilidade maka diferente.

Nia aprezenta komparasaun ida katak, sira hotu-hotu iha ró ahi ida nia laran, ida-idak iha nia funsaun rasik. Bainhira ema ida de’it mak laiha, ró ahi ne’e sei la funsiona di’ak.

Falur Rate Laek, dehan, maske membru 27 ne’e konkista ona vitória balu, maibé iha buat naruk ne’ebé tenke hakur tuir mak presiza hadi’a dixiplina institusionál, no mós dixiplina familiar.

“Imi hahú buat rua ne’e di’ak, ita sei la’o tán bá oin. Sé ita-boot sira la halo buat rua ne’e ho di’ak, ita bele mout fali iha dalan. Paradu ho ida ne’e, ita hakiduk fali ba kotuk. Tanba kuandu ita-nia vida ne’e iha prosesu ida nia laran, ne’e kompleksu no delikadu. Dezafia ita loroloron de’it, koko ita loro-loron de’it, ita nia kbi’it no beran,” nia hateten.

Nia dehan, servisu hotu-hotu ne’ebé hala’o, sempre interligadu ka iha ligasaun bá malu. Hadi’a komportamentu, no sente iha responsabilidade bá servisu.

Xefe estadu maiór jenerál ne’e dehan, membru na’in-27 ne’ebé hetan promosaun, sei oportunidade atu hasa’e tán sira ninia karreira profisionál, hodi bá kompete tán iha kursu formasaun ofisial. Maibé tenke hatudu hahalok di’ak iha servisu fatin no iha sosiedade.

“Ha’u kuandu halo avaliasaun di’ak ba o, mais ema seluk dehan la di’ak, ne’e labele. Tanba ida hanesan ne’e mak imi haree, imi nia konsellu promosaun foin reuniaun ne’e kleur, diskute malu kleur, haree imi ida-idak nia data baze, haree imi ida-idak ninia esforsu, nia servisu, imi nia antiguidade, imi nia kursu ne’e valór hira, imi nia prontidaun iha ne’ebé. Sira haree hotu ida ne’e mak promove imi,” Falur Rate Laek hateten.

Iha serimónia promosaun diviza ne’e, tula direta hosi Tenente Jenerál Domingos Raúl “Falur Rate Laek” ho Xefe Estadu Maiór F-FDTL, Comodoro Donaciano da Costa “Pedro Klamar Fuik”.

Iha promosaun ne’e, membru Valério Valente, ho Januário dos Santos, hosi Postu Majór bá Tenente-Coronel. Enkuantu, Petrus Ceunfin, hosi Postu Capitão bá Major.

Membru sira ne’ebé ho Postu Segundu Sarjentu ba Primeiru Sarjentu mak hanesan, Quintão Soares, Constantino da Costa, Agostinho António Boavida, Maria das Neves Amélia, Geoncio Zesmenito dos Reis Correira, Rosita Maria Sanches, Julito Soares, Francisco Punef Caet, Cornelio Abi, Simão Lopes Oliveira, Ambelita Ximenes, Amena de Jesus.

Domingos Pereira, Placido Baptista Barros, Henrique Eugébio Guterres, Leandro Suzano de Jesus, Martinha da Costa Araújo, Ana Rosalia Ximenes, Maria Zunia, Armando Pinto Soares, Zeca Lino Francisco da Silva, Martinho Barros, Josefina Marques, Paquela da Costa Araújo, hosi postu Segundu Sarjentu, promovidu ba Primeiru Sarjentu.

Promosaun ne’e bazeia despaxu No.014/CEMG F-FDTL/2022 no dekretu lei No 33/2020 tuir estatutu Militár FALINTIL-Forsa Defeza Timor-Leste, 2 Setembru, liu hosi enkontru konsellu promosaun F-FDTL.

Jornalista: Rogério Pereira Cárceres