Hatutan.com, (12 Agostu 2022), Díli— Komisaun organizadora ba dezlutu nasionál Saudozu Max Sthal nian, propoin $25.000 ba Governu, ne’ebé tuir planu sei realiza iha 27-28 Outubru tinan ne’e iha Díli.

Espoza Max Stahl, Ingrid Bucens, fó omenajen ikus iha Rate Santa Crúz, Sesta (17/12/2021). Foto/Hatutan.com

“Proposta orsamentu ne’ebé prepara hosi ekipa komisaun organizadora hodi submete ba governu ho valór $25.000-resin,” Koordenadór Komisaun Organizadora, Rogério Castro hateten hafoin hasorumalu ho Ministru Prezidénsia Konsellu Ministru (MPKM), Fidelis Leite Magalhães, iha Palásiu Governu, Díli, Sesta (12/08/2022).

Lee Mós: Xanana-Horta Simu Sinza Max Stahl, Governu Agradese Família

Durante enkontru ne’e komisaun organizadora husu Governu atu servisu hamutuk ho komisaun, nune’e depois de halo dezlutu, kontinua kedan halo inaugurasaun ba rate, kampa ne’ebé mak oras ne’e la’o hela, atinje 95%.

Ekipa komisaun organizadóra informa asuntu ne’e ba governu, tanba saudozu Max Sthal nu’udár Eroi ida ba Timor-Leste nia luta ba libertasaun nasionál.

Molok ne’e, bainhira saudozu hakotu iis, Ministru Prezidénsia no Konsellu Ministru, Fidelis Magalhães mak organiza direta serimónia haloot saudozu ninia ahu-kdesan iha Semitériu Santa Kruz Díli.

“Entaun, ami tenke ba liu lai hosi nia, depois mak nia bele fó fali informasaun ba Konsellu Ministru, ka ba iha kada Ministériu mak iha liagsaun,” Rogério Castro hateten.

Tuir ajenda hosi komisaun organizadora katak, serimónia dezlutu ba saudozu nian iha 27 Outubru 2022, sei hahú ho semináriu loron sorin.

Iha lorokraik, sei iha animasaun hosi artisita sira, iha mós aprezentasaun dansa kulturál, iha Igrela Motael.

Iha kalan, sei halo reflesaun hamutuk no iha Sesta 28 Outubru 2022, sei ensera ho atividade missa.

Família Matebian Sei Partisipa

Tuir planu, iha serimónia ne’e partisipa mós hosi familia saudozu Max Sthal nian, hanesan kaben ho oan sira ne’ebé sei to’o iha Díli antes no Governu mak sei organiza hotu sira nia viajen.

Iha serimónia dezlutu saudozu Max Sthal nian ne’e, sei komemora hamutuk mós ho sauzodu Sebastião Gomes nia loron mate, iha 28 fulan-Outubru no iha tinan 2022 komemora ba dala-31.

Tanba saudozu na’in-rua mate iha data ne’ebé mak hanesan, nune’e parte komisaun organizadora mós sei buka atu koordena ho Sekretáriu Estadu Juventude no Desportu (SEJD), atu bele tau iha kalendáriu ida ne’ebé fiksu, nune’e ba futuru bele selebera dala-ida de’it.

Jornalista: Rogério Pereira Cárceres