Hatutan.com, (24 Agostu 2022), Díli- Sekretáriu Jerál Federasaun Futeból Timor Leste (FFTL), Gregório Correia, hateten FFTL iha prontidaun finansia Liga Futeból Timor Leste (LFTL) époka 2022-2023, maibé FFTL triste tamba too oras ne’e órgaun liga “laiha” resposta pozitivu, nune’e FFTL nafatin hein órgaun Liga Timorense nia desizaun molok konvoka reuniaun ho klube sira.

Lee Mós : Organiza Liga Époka 2022-2023, LFTL Prontu Ezekuta Ordem

Prezidente FFTL, Francisco Jeronimo ho Sekretariu Jerál Gregorio Correia. Foto/Dok.Hatutan.com

Sekretáriu Jerál FFTL, Gregório Correia, Kuarta (24/08/2022) iha FFTL klarifika katak iha loron 12 fulan-Agostu, manda ona karta ofisial ida bá iha órgaun  LFTL hodi hatudu vontade atu iha enkontru entre federasaun no órgaun liga hodi diskute asuntu tékniku liga ho kalendáriu bá kompetisaun no apoiu finanseiru ne’ebé FFTL no Governu liuhosi Sekretáriu Estadu Juventude no Desportu (SEJD) sei atribui hodi finansia LFTL époka 2022-2023 ho montante  $400.000.00 maibé too oras ne’e LFTL laiha resposta.

Gregório Correia dehan, FFTL halo ona esforsu liuhosi kontaktu via telefónika ho diretór relasaun publika no apoiu tékniku LFTL nian, infelizmente too agora seidauk fó resposta tamba superior LFTL seidauk iha desizaun ruma relasiona ho karta ne’ebé parte FFTL submete bá.

“Lori prezidente no estrutura tomak iha FFTL hakarak halo anúnsiu bá públiku katak FFTL no SEJD iha ona klareza bá realizasaun liga Timorense époka 2022-2023 no hein de’it órgaun liga sira-nia resposta bá karta ne’ebé FFTL haruka tiha ona ba hodi hahú organiza liga Timorense bá époka ne’e,” Gregório Correia hateten.

Karta FFTL nian bá Órgaun LFTL. Foto/Dok

Uainhira iha tempu badak mak LFTL laiha dunik vontade bá karta hosi FFTL ba realizasaun Liga Timorense époka 2022-2023, FFTL sei iha desizaun rasik hodi halo karta direita bá klube sira hodi ko’alia direita tamba hein de’it diresaun liga too agora seidauk iha serteza.

“Ami husi federasaun rasik la aguenta ona atu hein tamba públiku kestiona katak FFTL mak labele organiza liga, maibé públiku mós tenke hatene katak iha Timor ita iha órgaun liga no se FFTL dei’t ami halo tiha ona,” Nia subliña.

Sekretáriu Jerál FFTL ne’e hatutan tamba konsidera malu no mesak hadomi futeból de’it, ikus mai FFTL mak hetan fali buat la di’ak nune’e FFTL husu bá públiku atu hatene katak FFTL hanesan aman no inan bá bola, maibé órgaun liga mak iha kompetensia atu organiza liga la’ós FFTL.

FFTL sei nafatin fó konsiderasaun bá órgaun LFTL no solusaun ikus fó tan biban semana ida atu órgaun liga fó resposta bá karta hosi FFTL antes tama bá loron 01 fulan-Setembru no uainhira laiha maka FFTL sei foti inisiativa hodi konvoka reuniaun ho klube sira hodi hanoin hamutuk liga époka 2022-2023 ba oin.

Too notísia ne’e hatún parte Hatutan.com tenta halo konfirmasaun ho órgaun liga iha edifísiu LFTL, estádiu Munisipál Díli, maibé ezekutivu LFTL sira laiha fatin.

Jornalista: Vito Salvadór