Hatutan.com, (26 Agostu 2022), Díli— Batik Air loke ona ninia rute foun hodi semo hosi Aeroportu Internasional I Gusti Ngurah Rai Denpasar Bali, Indonézia mai Aeroportu Internasionál Prezidente Nicolau Lobato, Díli, Timor Leste (TL), ho objetivu atu fó apoiu ba rekoperasaun ekonomia globál, fazeadamente iha sudeste Aziátiku espesialmente iha Indonézia no TL.

Lansamentu voo Batik Air iha Aeroportu Internasional Prezidente Nicolau Lobato, Díli, Timor Leste (TL), Kuarta (24/08/2022). Foto/Espesiál.

“Disponibilidade ba serbisu voo internasionál ida-ne’e iha esperansa katak,  sei fó kontribuisaun hodi aselera asesu no hafásil mobilidade, fó kontribuisaun ba iha roda ekonomia liu liu iha esportasaun no importasaun, turizmu no hametin relasaun entre nasaun rua,” Hatutan.com sita deklarasaun hosi Korporativa Komunikasaun Estratéjiku Batik Air, Danang Mandala Prihantoro ne’ebé públika hosi Detiktravel, Tersa (23/08/2022).

Diresaun ka Rute ne’e loke ofisialmente iha loron 24 Agostu 2022 ne’ebé tuir planu sei semo la para ka la halo transit ho nia oráriu voo nian hanesan tuir-mai:

Bali (DPS) – Díli (DIL), Númeru voo nian maka ID-8060: ne’ebé oras semo iha tuku 07.00, no to’o iha fatin iha tuku 10.00.

Dili (DIL)-Bali (DPS), Númeru voo ID-8061: semo iha tuku 11.00, to’o iha tuku 12.00.

Iha diferensa tempu ka oras voo nian kuaze oras ida, entre Díli ho Denpasar. Oras Díli nian lais liu oras ida kompara ho oras iha Denpasar.

Voo dahuluk rute foun ne’e hahú ona iha 24 Agostu 2022 no voo hosi Bali ba Díli, nune’e mós  Díli ba Bali  sei halo operasaun dala ida de’it iha semana ida nia laran ho nia oráriu fiksu iha loron Kuarta.

Voo Batik Air Bali-Dili-Bali ne’e sei enkurta no hafasil mós tempu viajen nian, tantu klase bisnis no mós turista sira.

Jornalista: Rogério Pereira Cárceres