Hatutan.com, (01 Setembru 2022), Díli—Iha tempu badak, Governu Austrália sei oferese tán millaun $13 ba Governu Timor Leste (TL).

Ministra Negósiu Estranjeiru no Kooperasaun (MNEK) Austrália, Penny Wong ho Ministra Negósiu Estranjeiru no Kooperasaun (MNEK) Timor Leste, Adaljiza dos Reis Magno hala’o konferénsia imprensa iha edifísiu MNEK, Praia dos Coqueiros, Díli, Kinta (01/09/2022). Foto/Hatutan.com.

“Austrália sei oferese dolar Australianu millaun 20 ba TL ne’ebé iha valór dolar Amerikanu ekivalente ho millaun $13. Hosi ha’u nia pakote ba resposta Covid-19 iha TL,” Ministra Negósiu Estranjeiru no Kooperasaun (MNEK) Austrália, Penny Wong hateten liuhosi konferénsia imprensia iha edifísiu MNEK, Praia dos Coqueiros, Díli, Kinta (01/09/2022).

Lee Mós: Austrália Harii Edifísiu Rua ba PNTL ho Fasilidade Moderna

Fundus ne’e sei fó, hanesan suporta ba Orsamentu Jerál Estadu (OJE) no Governu TL liuhosi Ministériu Finansas bele uza iha ninia programa.

Ministra Penny Wong konsidera fundu ne’ebé Governu Austrália sei oferese ne’e, Governu TL bele uza hodi halo pagamentu ba labarik sira, no mós feto ho isin-rua, liuhosi Programa Bolsa da Mãe Jerasaun Foun.

La’ós ne’e de’it, orsamentu ho montante dolár Australianu millaun 20  ne’e, bele uza ba programa Nasionál Dezenvolvimentu Suku (PNDS).

Suporta ida ne’e mós bele uza iha programa treinamentu no dezenvolvimentu, inklui ba programa traballadór Seasonal, nomós ba programa Mobilidade laborál Skill, tanba treinamentu importante tebes.

Ministra ne’e ko’alia ona ho Prezidente Repúblika, José Ramos-Horta kona-bá importánsia, ninia hatene ba jerasaun foun timoroan, dezenvolve kapasidade traballadór sira, importante tebes.

Austrália konsidera TL hanesan kolega di’ak, tanba sempre hamutuk iha relasaun sira bilaterál nian iha área oioin, sai hanesan respeitu ne’ebé kle’an tebes (mútua).

Ministra ne’e sente onradu tebes, tanba durante vizita iha TL, halo ona enkontru ho Prezidente Repúblika (PR), José Ramos-Horta, Primeiru Ministru RDTL, Taur Matan Ruak, Ministru Finansas (MF), Rui Augosto Gomes, inklui ministra Adaljiza Magno.

Iha fatin hanesan, Ministra Negósiu Estranjeiru no Kooperasaun (MNEK) Timor Leste, Adaljiza dos Reis Magno hateten sorumutu ne’ebé hala’o iha Kuarta (31/08/2022) ko’alia asuntu barak tebes, liu-liu oinsá hametin relasaun bilaterál entre Austrália ho TL, kona-bá adezaun Timor-Leste ba Association Of South East Asean Nations (ASEAN), no World Trade Organization (WTO).

“Ami ko’alia kona-bá oinsá Austrália ho TL koolabora atu hasa’e kresimentu ekonomia, suporta ba orsamentu do estadu ne’ebé mak sira sempre fó no sira iha kompromísiu atu aumenta tán dolar Australianu millaun 20. Ko’alia kona-bá dezenvolvimentu greater sunrise, ami mós ko’alia seguransa marítima, nomós mobilidade nian ba traballadór sira,” Adaljiza Magno informa.

Jornalista: Rogério Pereira Cárceres