Hatutan.com, (05 Setembru 2022), Díli—FALINTIL Forsa Defeza Timor-Leste (F-FDTL), liuhosi Komisaun Rekrutamentu iha Segunda 05 Setembru 2022, anunsia ona rezultadu finál kona-bá prosesu teste ba kandidatu foun na’in 600 ne’e mak selesionadu, hodi inkorpora ba instituisaun militár iha 20 setembru 2022. 

Segundu koordenadór jerál ba Komisaun Rekrutamentu, Tenente Coronel, Mario Baptisa “Bersama” anunsia rezultadu liu hosi konferénsia imprénsa iha Kuartel Jenerál Fatuhada, Díli, Segunda (05/09/2022). Foto/Hatutan.com.

Segundu koordenadór jerál ba Komisaun Rekrutamentu, Tenente Coronel, Mario Baptisa “Bersama” informa, prosesu teste ne’ebé sira hala’o ba aplikante sira durante fulan-ida nia laran, hahú hosi 25 jullu to’o 25 Agostu 2022 konklui ona no parte komisaun rasik mós halo ona avaliasaun finál ba rezultadu teste ne’e.

Lee Mós: Rekrutamentu F-FDTL 2022, Laiha Rekomedasaun Espesiál

Hosi rezultadu ida-ne’e, parte komisaun rekrutamentu entrega ona mós rezultadu ba Ministru Defeza (MD), Filomeno da Paixão de Jesus no Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek”.

“Dokumentu ida ne’e hetan ona aprovasaun finál no apartir aban komisaun rekrutamentu, sei dezloka ba iha munisipiu 13 ho RAEOA, atu taka sai naran 600 feto ka mane, ne’ebé mak aptus ka pasa iha testes ne’ebé mak hala’o iha Metinaro. Sira ne’e mak sei inkorpora iha Metinaro tuir data ne’ebé mak ita fó sai katak, iha dia 20 Setembru, sei tama atu hahú treinamentu,” Tenente Coronel, Mario Baptisa “Bersama” hateten liuhosi konferénsia imprénsa iha Kuartel Jenerál Fatuhada, Díli, Segunda (05/09/2022).

Xefe Gabinete Xefe Estadu Maior Jenerál F-FDTL hateten entre kandidatu sira hamutuk na’in 600 ne’e, komisaun rekrutamentu mós fó prioridade ba feto, tanba haree igualidade ba jéneru, nune’e tenke iha balansu.

Entaun, iha tinan ida ne’e, bazeia ba teste sira ne’ebé mak hela’o, selesiona ona feto hamutuk ema na’in 65 (10,5%), no mane hamutuk 535 (89,5%).

“Tanba ne’e, hakarak husu ba aplikantes sira atu haree sira nia naran, nomós informasaun adisionais relativamente ba inkorporasaun ne’ebé mak sei halo, iha ida-idak nia munisipiu, postus administrativus, nomós iha Komandu PNTL Munisipiu sira,” komandante “Bersama” dehan.

Komisaun rekrutamentu husu ba kandidatu sira ne’ebé mak selesionadu, atu inkorpora iha sentru instrusaun Nicolau Lobato, iha Metinaro, presiza haree kritéria sira mak hanesan tuir mai ne’e;

Iha (19/09/2022), aplikante sira ne’ebé aptu ka pasa ona, sei aprezenta aan iha Kuartel Jenerál F-FDTL, Fatuhada, Dili, hodi halo konfirmasaun.

Iha (20/09/2022), tuku 07:30, dadeer, komisaun rekrutamentu sei transporta ka tula aplikante sira ba iha Metinaro.

Kandidatu sira ne’ebé aptu, tenke ba loke kedas konta bankária ida-idak, tuir banku ne’ebé sira hakarak.

Kada kantidatu sei lori kópia koloridu konta bankária ida, kartaun eleitóral no foto koloridu ho media (3×4) tahan rua, iha loron ne’ebé kandidatu sira aprezenta aan, iha Kuartél Jenerál, Fatuhada, Dili.

Kada kandidatu tenke lori ho roupa jinástiku, sapatilla no meias mutin páres-rua, kalsa metan no kamizola mutin.

Kada kandidatu autoriza lori de’it roupa sívil, kalsa naruk no kamizola gola pár rua, lori mós ho lámina, hodi koi hasan-rahun kaixa ida, eskóva ho garaixa sapatu kór metan. Lori rellozu liman ida.

Kandidatu ne’ebé atu ba aprezenta aan, fuuk tenke tesi halo badak, sentímu ida ba mane, no feto 10 sentímu.

Jornalista: Rogério Pereira Cárceres